Kl Rahul Sweep Shot Hits Nishan Madushka: भारत आणि श्रीलंका या दोन्ही संघांमध्ये सुरू असलेल्या २ कसोटी सामन्यांच्या मालिकेतील पहिला सामना गॉल येथे सुरू आहे. या सामन्यात भारतीय संघाचा कर्णधार शुबमन गिलने नाणेफेक जिंकून प्रथम फलंदाजी करण्याचा निर्णय घेतला आहे. भारतीय संघाकडून डावाची सुरुवात करण्यासाठी आलेल्या केएल राहुल आणि यशस्वी जैस्वालने चांगली सुरुवात करून दिली. यादरम्यान केएल राहुलने असा काही शॉट मारला, ज्यामुळे श्रीलंकेच्या खेळाडूला मैदान सोडून बाहेर जावं लागलं. नेमकं काय घडलं? जाणून घ्या.
तर झाले असे की, भारतीय संघाची फलंदाजी सुरु असताना १० वे षटक टाकण्यासाठी प्रभात जयसूर्या गोलंदाजीला आला. त्यावेळी केएल राहुल स्ट्राईकवर होता. या षटकातील पाचव्या चेंडूवर केएल राहुलने जोरदार स्वीप शॉट मारला. हा चेंडू परफेक्ट मिडल झाला होता. पण चेंडू शॉर्ट लेगला असलेल्या निशान मदुष्काच्या हेल्मेटच्या मध्यस्थानी जाऊन लागला. चेंडू त्याच्या हेल्मेटला जोरात लागून फाईन लेगच्या दिशेने गेला. त्यानंतर केएल राहुलने धावून १ धाव पूर्ण केली. पण धाव पूर्ण केल्यानंतर त्याने लगेचच काळजीपोटी मदुष्काकडे धाव घेतली.
केएल राहुलचा जोरदार फटका, श्रीलंकेचा खेळाडू दुखापतग्रस्त
चेंडू लागताच फिजिओ मैदानात आले आणि तातडीने मदुष्काची तपासणी सुरु केली. फलंदाजी, गोलंदाजी किंवा क्षेत्ररक्षण करताना डोक्याला चेंडू लागला की, कन्कशन टेस्ट करणं गरजेचं आहे. त्यामुळे सामना काही वेळासाठी थांबवण्यात आला होता. काही वेळानंतर त्याचे शिन पॅड काढले आणि तो मैदानाबाहेर गेला. या घटनेनंतर केएल राहुललाही काळजी वाटू लागली होती. मदुष्काच्या दुखापतीबाबत कुठलीही अधिकृत माहिती समोर आलेली नाही. आशा आहे की, तो लवकरच फिट होऊन पुनरागमन करेल.
भारतीय संघाच्या १०० धावा पूर्ण
गॉलच्या मैदानावर सुरु असलेल्या या सामन्यात भारतीय संघाने नाणेफेक जिंकून प्रथम फलंदाजी करण्याचा निर्णय घेतला आहे. भारतीय संघाकडून यशस्वी जैस्वाल आणि केएल राहुलची जोडी मैदानावर आली. दोघांनी मिळून पहिल्या विकेटसाठी ४७ धावा जोडल्या. दोघे चांगले खेळत होते. पण ताळमेळमध्ये गडबड झाल्याने यशस्वी जैस्वालला धावबाद होऊन माघारी परतावं लागलं. यशस्वी जैस्वाल ३२ धावांवर माघारी परतला. त्यानंतर केएल राहुल आणि देवदत्त पडिक्कलने मिळून भारतीय संघाचा डाव सावरला. दोघांनी मिळून लंचब्रेकपर्यंत संघाची धावसंख्या १०० धावांच्या पार पोहोचवली आहे.केएल राहुल ३२ धावांवर नाबाद आहे. तर देवदत्त पडिक्कल ३५ धावांवर नाबाद आहे. पावसामुळे सामना सुरु होण्यास उशीर होत आहे.
