पॅरिस : किलियन एम्बापे आणि नेयमार या तारांकित आघाडीपटूंच्या हॅट्ट्रिकच्या जोरावर पॅरिस सेंट-जर्मेन संघाने लीग-१ फुटबॉलच्या सामन्यात क्लेर्मोन्टचा ६-१ असा धुव्वा उडवला. या सामन्यात लिओनेल मेसीच्या पासवर नेयमारने सहाव्या, तर एम्बापेने १९व्या मिनिटाला गोल करत सेंट-जर्मेनला २-० अशी आघाडी मिळवून दिली. मात्र, क्लेर्मोन्टच्या जोडेल दोसूने ४२व्या मिनिटाला गोल केल्याने मध्यंतराला सेंट-जर्मेनकडे २-१ अशी केवळ एका गोलची आघाडी होती. उत्तरार्धात सेंट-जर्मेनने अधिक आक्रमक खेळ केला. नेयमारने ७१व्या मिनिटाला पेनल्टीच्या साहाय्याने गोल झळकावताना सेंट-जर्मेनला पुन्हा दोन गोलची आघाडी मिळवून दिली. मग एम्बापेने ७४ आणि ८०व्या, तर नेयमारने ८३व्या गोलची नोंद करताना वैयक्तिक हॅट्ट्रिक पूर्ण केल्या.
