“ही जखम भरून यायला वेळ लागेल…”; अखेरच्या वर्ल्डकप फायनलमधील पराभवानंतर मेस्सीची भावुक पोस्ट, स्पेनबद्दल पाहा काय म्हणाला?

लिओनेल मेस्सी याने स्पेनविरुद्धच्या फिफा विश्वचषक अंतिम सामन्यातील पराभवाचं दुःख व्यक्त करत, ही वेदना विसरायला बराच काळ लागेल, असं म्हटलं. याचबरोबर संपूर्ण स्पर्धेदरम्यान साथ देणाऱ्या आपल्या सहकाऱ्यांचे आणि चाहत्यांचे त्याने मनापासून आभार मानले. तसेच, विश्वचषक जिंकणाऱ्या स्पेन संघाचंही मेस्सीने अभिनंदन केलं.

“या पराभवाचं दुःख प्रचंड आहे. ही जखम भरून यायला नक्कीच वेळ लागेल. पण या वेदनेसोबतच आम्ही मिळवलेले सुंदर क्षण, प्रत्येक सामन्यात सर्वस्व पणाला लावून दिलेली झुंज आणि कायम स्मरणात राहणाऱ्या आठवणीही मी जपून ठेवणार आहे. संपूर्ण स्पर्धेदरम्यान देशभरातील चाहत्यांनी दिलेला पाठिंबा आणि या संघाने केलेलं अथक परिश्रम यांच्यामुळे आम्ही पुन्हा एकदा जगातील सर्वोत्तम संघांमध्ये स्थान मिळवलं. त्यासाठी मी प्रत्येकाचा मनापासून आभारी आहे,” अशी पोस्ट मेस्सीने सोमवारी इन्स्टाग्रामवर केली.

“आज आपण काय साध्य केलं याची किंमत कदाचित लगेच जाणवणार नाही, पण या संघाने सलग दोन विश्वचषकांच्या अंतिम फेरीत स्थान मिळवलं, ही अभिमानाची गोष्ट आहे. प्रत्येक शुभेच्छा आणि मेसेजसाठी मी मनापासून आभारी आहे. पुन्हा एकदा संपूर्ण देश एकत्र आला आणि अर्जेंटिनाचा असल्याचा अभिमान सर्वांनी एकत्र साजरा केला. विश्वचषक जिंकल्याबद्दल मी स्पेन संघाचंही मनापासून अभिनंदन करतो,” असं मेस्सीने म्हटलं.

दरम्यान, रविवारी झालेल्या अंतिम सामन्यानंतर अमेरिकेचे राष्ट्राध्यक्ष डोनाल्ड ट्रम्प यांच्या हस्ते मेस्सीने फिफा विश्वचषक २०२६ चे उपविजेतेपदाचं रौप्यपदक स्वीकारलं. न्यूयॉर्क-न्यू जर्सी स्टेडियमवर स्पेनविरुद्धची रात्र अर्जेंटिनासाठी निराशाजनक ठरली. २०२२ च्या विश्वविजेतेपदाच्या आनंददायी आठवणींना या पराभवाने धक्का बसला. पदक स्वीकारल्यानंतर व्यासपीठावरून खाली उतरताना मेस्सीच्या डोळ्यांत अश्रू तरळले. चाहत्यांना निरोप दिल्यानंतर तो अत्यंत भावुक होत निघून गेला.