LSG vs CSK: एकाना स्टेडियमवर मार्शचं वादळ! लखनौच्या विजयाचा राजस्थानला फायदा; चेन्नईचं टेन्शन वाढलं

लखनौ सुपर जायंट्स संघाला हा सामना जिंकण्यासाठी १८८ धावा करायच्या होत्या. या धावांचा पाठलाग करताना लखनौला जशी सुरुवात हवी होती, ती सुरुवात मिचेल मार्श आणि जोश इंग्लिस या जोडीने करून दिली. दोघांनी मिळून पहिल्या विकेटसाठी १३५ धावा जोडल्या आणि लखनौच्या विजयाचा पाया रचला. इम्पॅक्ट प्लेअर म्हणून फलंदाजीला आलेला जोश इंग्लिस ३६ धावांवर माघारी परतला. तर मिचेल मार्शने ३८ चेंडूत ९० धावांची खेळी केली. त्याचं शतक थोडक्यात हुकलं.

मिचेल मार्श बाद झाल्यानंतर अब्दुल समदही अवघ्या ८ धावांवर माघारी परतला. शेवटी निकोलस पूरनने नाबाद २० आणि मुकुल चौधरीने नाबाद १३ धावांची खेळी करून लखनौला विजय मिळवून दिला. या सामन्यातील पहिल्या डावात फलंदाजी करण्यासाठी आलेल्या चेन्नई सुपर किंग्स संघाला हवी तशी सुरुवात करता आली नव्हती. संजू सॅमसन अवघ्या २० तर ऋतुराज गायकवाड १३ धावा करून माघारी परतला. त्यानंतर उर्विल पटेल अवघ्या ६ धावांवर बाद झाला. कार्तिक शर्माने ७१ धावांची बहुमूल्य खेळी केली. शेवटी शिवम दुबेने नाबाद ३२ धावांची खेळी करून संघाची धावसंख्या १८७ धावांवर पोहोचवली.

चेन्नईच्या पराभवाचा राजस्थानला फायदा

हा लखनौचा या हंगामातील चौथा विजय ठरला आहे. ८ गुणांसह हा संघ गुणतालिकेत शेवटीच आहे. पण या पराभवाचा चेन्नईला चांगलाच फटका बसला आहे. चेन्नईचा संघ १२ गुणांसह सहाव्या स्थानी आहे. चेन्नईला हा सामना जिंकून टॉप ३ मध्ये प्रवेश करण्याची संधी होती. पण सामन्याआधी पाचव्या स्थानी असलेला चेन्नईचा संघ सहाव्या स्थानी पोहोचला आहे. तर नेट रनरेटच्या बळावर राजस्थानचा संघ पाचव्या स्थानी पोहोचला आहे.