शनिवारी अहमदाबाद येथील नरेंद्र मोदी स्टेडियमवर विश्वचषक-२०२३ मधील भारत विरुद्ध पाकिस्तानचा बहुप्रतिक्षित सामना पार पडला. या सामन्यात भारताने एकतर्फी वर्चस्व राखत पाकिस्तानला पराभूत केलं आहे. पण या सामन्यादरम्यान, एक प्रेक्षक आणि महिला पोलीस कर्मचाऱ्यामध्ये बाचाबाची झाल्याचं समोर आलं आहे. ज्यामध्ये महिला पोलीस कर्मचाऱ्याने एका तरुणाला कानशिलात लगावल्यानंतर संबंधित तरुणानेही महिलेस उलट मारण्याचा प्रयत्न केला आहे. याबाबतचा एक व्हिडीओ समोर आला असून सोशल मीडियावर वेगानं व्हायरल झाला आहे.
सोशल मीडियावर व्हायरल झालेल्या व्हिडीओमध्ये स्टँडमध्ये बसलेला एक तरुण आणि महिला पोलीस कर्मचारी यांच्यात शारीरिक बाचाबाची झाल्याचं दिसून येत आहे. हा वाद नेमका कशामुळे झाला? याची पुष्टी ‘लोकसत्ता’ करू शकली नाही. मात्र, गर्दी नियंत्रणात ठेवण्यासाठी महिला पोलिसाने हस्तक्षेप केल्यानंतर हा वाद सुरू झाल्याचं दिसून येत आहे.
‘एक्स’वर (पूर्वीचे ट्वीटर) शेअर केलेल्या व्हिडीओमध्ये, महिला पोलीस गर्दीत बसलेल्या एका तरुणाला कोणत्या तरी कारणावरून फटकारताना दिसत आहे. राग अनावर झाल्यानंतर महिला पोलिसाने संबंधित तरुणाला कानशिलात लगावली. यानंतर संबंधित तरुणानेही महिला पोलिसाला उलट मारण्याचा प्रयत्न केला. पण आजूबाजूच्या लोकांनी मध्यस्थी करत वाद मिटवला. या संपूर्ण घटनेचा व्हिडीओ सोशल मीडियावर व्हायरल झाला आहे.
हा व्हिडीओ सोशल मीडियावर व्हायरल झाल्यानंतर यावर संमिश्र प्रतिक्रिया उमटल्या आहेत. काही नेटकऱ्यांच्या मते महिला पोलिसाने तरुणाला चापट मारायला नको होती. तर काहींनी संबंधित तरुणाच्या कृतीचा निषेध केला आहे.
