विम्बल्डन : पुरुषांच्या महामुकाबल्यात महिला रचणार इतिहास, १४४ वर्षानंतर पहिल्यांदा ‘असे’ घडणार!

आज विम्बल्डनच्या अंतिम सामन्यात जोकोव्हिच-बेरेट्टिनी आमनेसामने

Marija cicak to be first woman to umpire Wimbledon mens final
मारिया सिसक जोकोव्हिच आणि बेरेट्टिनी यांच्यातील अंतिम सामन्यासाठी पंच म्हणून काम पाहणार आहे.

जगातील सर्वात जुनी टेनिस ग्रँडस्लॅम स्पर्धा विम्बल्डन येथे आज रविवारी नवीन इतिहास लिहिला जाणार आहे. क्रोएशियाची ४३ वर्षीय मारिया सिसक नोव्हाक जोकोव्हिच आणि माटिओ बेरेट्टिनी यांच्यातील पुरुष एकेरीच्या अंतिम सामन्यासाठी पंच म्हणून काम पाहणार आहे. १८७७ पासून विम्बल्डनच्या १४४ वर्षांच्या इतिहासात प्रथमच पुरुष एकेरीच्या अंतिम सामन्यात एखादी महिला पंच म्हणून कामगिरी करणार आहे.

सिसक ही गोल्ड बॅज चेअर पंच

मारिया सिसक ही गोल्ड बॅज चेअर पंच आहे. २०१२ पासून ती महिला टेनिस फेडरेशन (डब्ल्यूटीए) एलिट टीमची सदस्य आहे. टेनिसमधील सर्वाधिक श्रेणीतील पंचांना गोल्ड बॅज मिळतो. या आधी सिल्वर, ब्राँझ आणि ग्रीन बॅजेस आहेत.

सिसकने यापूर्वी अनेक महिला सामन्यांमध्ये पंच म्हणून काम पाहिले होते. २०१४मध्ये तिने महिला एकेरीच्या अंतिम फेरीत पंचगिरी केली होती. तीन वर्षांनंतर, २०१७मध्ये तिने विम्बल्डन येथे झालेल्या महिला दुहेरी सामन्यातही काम पाहिले होते. याशिवाय २०१६च्या रिओ ऑलिम्पिकमधील महिला एकेरीच्या सुवर्णपदकाच्या सामन्यातही सिसकने पंच म्हणून काम केले आहे.

 

 जोकरला मोठ्या विक्रमाची संधी

आज होणाऱ्या महामुकाबल्यात सर्बियाच्या नोव्हाक जोकोव्हिचचा विजय झाला, तर तो सर्वाधिक ग्रँडस्लॅम जेतेपद जिंकण्याच्या दृष्टीने रॉजर फेडरर आणि राफेल नदालची बरोबरी करेल. जोकोव्हिचने आतापर्यंत १९ ग्रँडस्लॅम जिंकले आहेत. यामध्ये ५ विम्बल्डन विजेतेपदांचा समावेश आहे. फेडरर आणि नदाल यांनी प्रत्येकी २० ग्रँडस्लॅम स्पर्धा जिंकल्या आहेत. यावेळी नदाल विम्बल्डनमध्ये खेळला नाही. तर, उपांत्यपूर्व फेरीत पराभूत झाल्यानंतर फेडरर स्पर्धेबाहेर पडला.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व क्रीडा बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Marija cicak to be first woman to umpire wimbledon mens final adn

ताज्या बातम्या