“३ डॉक्टर पाठवले, खासगी विमानाने मैदानावर..”, मार्क वुड आजारी असतानाही IPL फ्रँचायझीच्या मालकांनी खेळण्यास भाग पाडलं; मोठा खुलासा

मार्क वुड आयपीएलमध्ये चेन्नई सुपर किंग्स आणि लखनौ सुपर जायंट्स या संघांकडून खेळला आहे. त्याने आयपीएलमध्ये एकूण पाच सामने खेळले, २०१८ मध्ये चेन्नईकडून एक आणि २०२३ मध्ये लखनौकडून चार सामने खेळले होते. सध्या मार्क वुड दुखापतीमुळे आंतरराष्ट्रीय क्रिकेटपासूनदेखील लांब आहे.

वुडने बीबीसीच्या एका पॉडकास्टमध्ये बोलताना आयपीएलबाबतचा एक किस्सा सांगितला. तो एका हंगामात काही सामने खेळला आणि नंतर आजारी पडला. त्यानंतरही, संघ व्यवस्थापन आणि मालकांनी त्याला खेळवण्याचा आग्रह धरला, इतकेच नव्हे तर खाजगी विमानाचीही ऑफर दिली. वुड प्रसंग सांगताना म्हणाला, “मी तुम्हाला एक गोष्ट सांगतो, जी अजिबातच विनोदी नाहीये. माझी तब्येत बरी नव्हती. पाच सामन्यांनंतर मी आजारी पडलो आणि पुढचा सामना तीन दिवसांनी होता. त्यामुळे माझी काळजी घेणारे डॉक्टर दर अर्ध्या तासाने येऊन माझी तपासणी करायचे.

मार्क वुडने सांगितला आयपीएलमधील धक्कादायक किस्सा

मला आठवतं, एके दिवशी आयपीएल संघाच्या मालकाने फोन करून विचारलं, “कसे आहात? तयार आहात का?” मी म्हणालो, “खरं सांगायचं तर, मी काही खाल्लं किंवा प्यायलेलो नाही. मी अंथरुणातूनही उठू शकत नाही. चला, दुसऱ्या डॉक्टरला बोलवूया. आपण हे करू, ते करू. मग तीन डॉक्टर माझ्या खोलीत आले. ते मला औषधं देत होते आणि बरं व्हायला मदत करत होते, मार्क वुड पुढे सांगताना म्हणाला.

दुसऱ्या दिवशी, त्यांनी पुन्हा फोन करून विचारलं, “तुम्ही कसे आहात? काय नवीन अपडेट? तुला कसं वाटतंय? मी म्हणालो, मला अजूनही बरं वाटत नाहीये. मग तो म्हणाला, “मी तुम्हाला एक गोष्ट सांगतो. मी एक खाजगी विमान पाठवतो. तुम्ही विमानात बसा, सामना खेळा, मग त्याच विमानानने लगेच टीम हॉटेलमध्ये जा,” मार्क वुड पुढे सांगत म्हणाला.

मार्क वुडने या प्रसंगादरम्यान वडिलांशी काय संवाद साधला हे सांगितलं, मी माझ्या वडिलांना फोन करून म्हणालो, “बाबा, ते माझ्यासाठी एक खाजगी विमान पाठवत आहेत.” त्यांनी विचारलं, “पण तू कसा आहेस? तुला बरं वाटत नाहीये.” पण मी म्हणालो, “बाबा, मी खाजगी विमानाबद्दल बोललोय. पण या सगळ्यानंतरही मी खेळायला जाऊ शकलो नाही.” पण एका क्षणासाठी मला वाटलं की माझ्या आयुष्यात घडलेली ही सर्वोत्तम गोष्ट होती.“

वुडने कोणत्याही फ्रँचायझीचे नाव घेतलं नाही, परंतु त्याने दिलेल्या तपशिलावरून असं सूचित होतं की तो लखनौ फ्रँचायझीचा उल्लेख करत होता. तो या संघासाठी पाच सामने खेळला आहे. चेन्नईसाठी फक्त एक सामना खेळल्यानंतर त्याला प्लेईंग इलेव्हन खेळाडूंमधून वगळण्यात आलं. तो लखनौसाठी चार सामने खेळला, त्यापैकी एका सामन्यात त्याने पाच बळी घेतले.