Meg Lanning Record: महिला प्रीमियर लीग २०२६ स्पर्धेत एकापेक्षा एक रोमांचक सामने पाहायला मिळाले आहेत. या स्पर्धेतील सातवा सामना यूपी वॉरियर्स आणि दिल्ली कॅपिटल्स या दोन्ही संघांमध्ये सुरू आहे. या सामन्यात यूपी वॉरियर्सचा संघ नाणेफेक गमावून पहिल्या डावात फलंदाजी करण्यासाठी उतरला आहे. प्रथम फलंदाजी करताना यूपी वॉरियर्सला सुरूवातीलाच मोठा धक्का बसला. किरण नवगिरे शून्यावर माघारी परतली. पहिल्याच षटकात स्फोटक फलंदाज माघारी परतल्यानंतर कर्णधार मेग लॅनिंगवर डाव सांभाळण्याची मोठी जबाबदारी होती. तिने डाव सांभाळला आणि महिला प्रीमियर लीग स्पर्धेत मोठ्या विक्रमाला गवसणी घातली आहे.
या सामन्यात फलंदाजीला येण्यापूर्वी ती महिला प्रीमियर लीग स्पर्धेत १००० धावा करण्याच्या उंबरठ्यावर होती. या डावात फलंदाजीला आल्यानंतर ४ धावा करतात तिने महिला प्रीमियर लीग स्पर्धेत १००० धावा पूर्ण केल्या आहेत. यासह ती महिला प्रीमियर लीग स्पर्धेच्या इतिहासात १००० धावा करणारी तिसरीच फलंदाज ठरली आहे. याआधी मुंबई इंडियन्सच्या फलंदाज नेट सिव्हर ब्रंट आणि हरमनप्रीत कौरने या स्पर्धेत १००० धावांचा पल्ला गाठला आहे. सर्वात आधी १००० धावा पूर्ण करण्याचा विक्रम हा नेट सिव्हर ब्रंटच्या नावावर होता. त्यानंतर मुंबई इंडियन्सची कर्णधार हरमनप्रीत कौरने गुजरात जायंट्स संघाविरूद्ध फलंदाजी करताना १००० धावांचा पल्ला गाठला. तिने या सामन्यात ७१ धावांची निर्णायक खेळी करून मुंबई इंडियन्सला विजय मिळवून दिला होता.
हे आहेत महिला प्रीमियर लीग स्पर्धेत सर्वाधिक धावा करणाऱ्या फलंदाज
नेट सिव्हर ब्रंट- ११०१ धावा
हरमनप्रीत कौर- १०१६ धावा
मेग लॅनिंग- १००० धावा
एलिस पेरी- ९७२ धावा
शफाली वर्मा- ८८७ धावा
मेग लॅनिंग या हंगामात पहिल्यांदाच यूपी वॉरियर्स संघाकडून खेळण्यासाठी मैदानात उतरली आहे.याआधी झालेल्या तिन्ही हंगामात तिने दिल्ली कॅपिटल्स संघाचं नेतृत्व केलं होतं. यासह दिल्लीला फायनलमध्येही पोहोचवलं होतं. पण ती दिल्लीला विजय मिळवून देऊ शकली नव्हती. यावेळी तिच्याकडे यूपी वॉरियर्सच्या नेतृत्वाची जबाबदारी सोपवण्यात आली आहे. पण सुरूवातीच्या दोन्ही सामन्यांमध्ये यूपीला पराभवाचा सामना करावा लागला आहे.
या सामन्यासाठी अशी आहे यूपी वॉरियर्स संघाची प्लेईंग ११:
किरण नवगिरे, मेग लॅनिंग (कर्णधार), फिबी लिचफील्ड, हरलीन देओल, श्वेता सेहरावत (यष्टीरक्षक), क्लो ट्रायोन, दीप्ती शर्मा, सोफी एक्लेस्टोन, आशा सोभना, शिखा पांडे, क्रांती गौड.
