Australia won the World Cup for the sixth time: मेग लॅनिंगच्या नेतृत्वाखालील ऑस्ट्रेलिया संघ आयसीसी टी-२० विश्वचषक २०२३ चा चॅम्पियन बनला. केपटाऊनच्या मैदानावर खेळल्या गेलेल्या अंतिम सामन्यात ऑस्ट्रेलियाने दक्षिण आफ्रिकेचा १९ धावांनी पराभव केला. बेथ मुनीच्या (५३ चेंडूत नाबाद ७४ धावा) शानदार अर्धशतकाच्या जोरावर ऑस्ट्रेलियाने १५६/६ अशी धावसंख्या उभारली. प्रत्युत्तरात यजमान दक्षिण आफ्रिकेने २० षटकांत ६ गडी गमावून १३७ धावा केल्या. ऑस्ट्रेलियाने सहाव्यांदा ट्रॉफीवर कब्जा केला आहे. त्याचबरोबर मेग लॅनिंगने एक मोठा विक्रम केला आहे. लॅनिंगने पाँटिंगचा विक्रम मोडला - लॅनिंगने ऑस्ट्रेलियाच्या सर्वात यशस्वी कर्णधारांपैकी एक असलेल्या रिकी पाँटिंगचा मोठा विक्रम मोडला आहे. लॅनिंग ही सर्वात मोठ्या आयसीसी स्पर्धा जिंकणारी कर्णधार बनली आहे. लॅनिंगने आतापर्यंत ५ स्पर्धा जिंकल्या आहेत. त्याच्या नेतृत्वाखाली ऑस्ट्रेलियाने चार टी-२० विश्वचषक आणि एक वनडे विश्वचषक जिंकला आहे. त्याचबरोबर पाँटिंगने त्याच्या कारकिर्दीत ऑस्ट्रेलियाला चार आयसीसी ट्रॉफी मिळवून दिल्या. त्याच्या नेतृत्वाखाली ऑस्ट्रेलियाने दोन एकदिवसीय विश्वचषक आणि दोन आयसीसी चॅम्पियन्स ट्रॉफी जिंकल्या आहेत. त्याचबरोबर एमएस धोनीच्या नेतृत्वाखाली भारतीय संघाने तीन आयसीसी ट्रॉफी जिंकल्या आहेत ऑस्ट्रेलियाची विजेतेपदाची चौथी हॅटट्रिक - चॅम्पियन बनताच ऑस्ट्रेलियाने विजेतेपदाची हॅट्ट्रिक पूर्ण केली. ऑस्ट्रेलियाने २०१८, २०२० आणि २०२३ मध्ये महिला टी-20 विश्वचषक जिंकला. लॅनिंगच्या नेतृत्वाखाली ऑस्ट्रेलियाने या तिन्ही ट्रॉफी जिंकल्या. सलग तीन ट्रॉफी जिंकणारी ती पहिली कर्णधार आहे. महिला टी-२० विश्वचषकात ऑस्ट्रेलियाची विजेतेपदाची ही दुसरी हॅटट्रिक आहे. ऑस्ट्रेलियाने यापूर्वी २०१०, २०१२ आणि २०१४ महिला टी-२० विश्वचषक जिंकले होते. याशिवाय ऑस्ट्रेलियाने अजून दोनदा विजेतेपदाची हॅटट्रिक करण्याचा पराक्रमही केला आहे. महिला एकदिवसीय विश्वचषक स्पर्धेत ऑस्ट्रेलियाने प्रथमच हा पराक्रम केला. ऑस्ट्रेलियन संघ १९७८, १९८२ आणि १९८८ मध्ये स्पर्धेत चॅम्पियन बनला होता. कांगारू संघाने पुरुषांच्या एकदिवसीय विश्वचषकातही अशीच कामगिरी केली आहे. ऑस्ट्रेलियन पुरुष क्रिकेट संघाने १९९९, २००३ आणि २००७ मध्ये एकदिवसीय विश्वचषक जिंकला. हेही वाचा - Womens T20 WC 2023: वर्ल्ड चॅम्पियन ऑस्ट्रेलियाला मिळाले करोडो रुपये, जाणून घ्या कोणता पुरस्कार कोणाला मिळाला? कांगारूंना मिळाले ८.२७ कोटी रुपये - आयसीसीने महिला टी-२० विश्वचषक २०२३ ची बक्षीस रक्कम आधीच जाहीर केली होती. या स्पर्धेत एकूण रु. २०.२८कोटी (US$24.5 दशलक्ष) पणाला लागले होते, जे संघांना त्यांच्या कामगिरीच्या आधारे दिले जाणार होते. अशा परिस्थितीत सहाव्यांदा विश्वविजेतेपद पटकावल्यानंतर ऑस्ट्रेलियाच्या खात्यात ८.२७ कोटी रुपये जमा झाले आहेत. तर उपविजेत्या दक्षिण आफ्रिकेला ४.१३ कोटी रुपये मिळाले.
