Mirabai Chanu Asian Games Silver Medal: भारताच्या मीराबाई चानूचं स्वप्न अखेरीस पूर्ण झालं आहे. ऑलिम्पिक कॉमनवेल्थसह विविध खेळांमध्ये पदकं जिंकणाऱ्या मीराबाई चानूने आता आशियाई क्रीडा स्पर्धेत आपलं पहिलं पदक पटकावलं आहे. आईची-नागोया येथ सुरू असलेल्या आशियाई क्रीडा स्पर्धेत मीराबाई चानूने रौप्य पदकाला गवसणी घातली आहे.

मीराबाई चानूच्या पदकांच्या संग्रहात एका पदकाची कमतरता होती. अनेक वर्षं ही उणीव एखाद्या अपूर्ण वाक्यासारखी तिच्या कारकिर्दीत राहिली. ऑलिम्पिकमध्ये रौप्यपदक, विश्वविजेतेपद आणि राष्ट्रकुल स्पर्धेतील अनेक सुवर्णपदकं तिने आपल्या नावावर केली. यश, अपयश आणि दुखापतींचा सामना करत वजन उचलत तिने भारतीय क्रीडा विश्वातील सर्वात विश्वासार्ह खेळाडूंपैकी एक म्हणून आपली ओळख निर्माण केली. मात्र, तिच्या पदकांच्या संग्रहात आशियाई क्रीडा स्पर्धेतील पदक नव्हतं. आता मात्र ही उणीवही भरून काढली आहे.

मीराबाई चानूने बुधवारी नागोयामध्ये महिलांच्या ४९ किलो वजनी गटात रौप्यपदक जिंकत आपल्या कारकिर्दीतील प्रमुख पदकांचा संग्रह पूर्ण केला. यासह १९९८मध्ये बँकॉक आशियाई क्रीडा स्पर्धेत कर्णम मल्लेश्वरीने रौप्यपदक जिंकल्यानंतर आशियाई क्रीडा स्पर्धेत वेटलिफ्टिंगमध्ये पदक जिंकणारी मीराबाई भारताची पहिली खेळाडू ठरली. तिच्या कारकिर्दीची ओळख सांगायची झाली, तर हे पदक तिच्यासाठी सर्वात योग्य ठरावं, कारण यशाबरोबर अपयश आणि दुखापतींचाही सामना केलेल्या तिच्या प्रवासात सातत्य आणि जिद्द हीच सर्वात मोठी ताकद राहिली आहे.

रिओ ऑलिम्पिक हे तिच्या कारकिर्दीतील मोठं पर्व ठरणार होतं. मात्र, तिला एकदाही योग्य पद्धतीने वजन उचलता आलं नाही. पाच वर्षांनंतर टोकियो ऑलिम्पिकमध्ये तिने या अपयशावर मात करत रौप्यपदक जिंकलं. त्यानंतर हांगझोऊ आशियाई क्रीडा स्पर्धेत अखेर आशियाई पदकाची उणीव भरून काढण्याची संधी होती. मात्र, तिथेही तिच्या हातून पदक निसटलं आणि तिला चौथ्या स्थानावर समाधान मानावं लागलं. आणखी तीन वर्षांनी ती पुन्हा जपानमध्ये परतली यावेळी नागोयामध्ये अखेर रौप्यपदक जिंकत आशियाई क्रीडा स्पर्धेतील पदकाचं स्वप्न पूर्ण केलं.

Live Updates