ICCने अफगाणिस्तानला पराभवानंतर दिला धक्का, ‘या’ खेळाडूवर केली दंडात्मक कारवाई; मैदानावरची एक चूक पडली महागात

ICCने मोहम्मद नबीवर का केली कारवाई?

१४व्या षटकात दक्षिण आफ्रिकेचा वेगवान गोलंदाज लुंगी एनगिडी गोलंदाजीला आला, तेव्हा नबी स्ट्राईकवर होता. त्याने एनगिडीने हातात घातलेला पिवळ्या रंगाचा बँड काढावा असं पंचांना सांगतिलं, या विषयावर तो पंचांशी हुज्जत घालताना दिसला. एनगिडीच्या हातातील बँड हा फिकट पिवळ्या रंगाचा होता, उजव्या हाताने गोलंदाजी करताना चेंडू बँडमुळे दिसणार नाही, असं नबीला वाटलं. त्यामुळे नबीने त्याला बँड काढायला सांगावं अशी पंचांशी चर्चा करत होता.

दक्षिण आफ्रिका आणि अफगाणिस्तान यांच्यातील सामना खूपच रोमांचक झाला होता. एक नाही तर दोन सुपर ओव्हरनंतर सामन्याचा निकाल लागला होता. टी-२० विश्वचषकाच्या इतिहासात पहिल्यांदाच एकाच सामन्यात दोन सुपर ओव्हर खेळवण्यात आल्या. तर दक्षिण आफ्रिका हा दोन सुपर ओव्हर खेळत विजय मिळवणारा देखील इतिहासातील पहिलाच संघ ठरला.

सुरूवातीला सामना बरोबरीत सुटला, दोन्ही संघांनी प्रत्येकी १८७ धावा केल्या. दक्षिण आफ्रिका आणि अफगाणिस्तान यांच्यातील पहिली सुपर ओव्हरही बरोबरीत राहिली. पहिल्या सुपर ओव्हरमध्ये प्रत्येकी १७ धावा झाल्या. दुसऱ्या सुपर ओव्हरमध्ये दक्षिण आफ्रिकेने २४ धावांचं योगदान अफगाणिस्तानला दिलं. अखेरच्या चेंडूवर ५ धावांची गरज असताना रहमानुल्ला झेलबाद झाला आणि परिणामी दक्षिण आफ्रिकेने सामना जिंकला.

अफगाणिस्तानसाठी हा सामना महत्त्वाचा होता. पण आणखी एका पराभवामुळे सुपर-८ मध्ये पोहोचण्याच्या त्यांच्या आशा धुळीस मिळाल्या आहेत. दक्षिण आफ्रिकेचा दोन सामन्यांतील हा सलग दुसरा विजय होता. दोन्ही संघ स्पर्धेच्या ड गटात आहेत, न्यूझीलंड सध्या गुणतालिकेत आघाडीवर आहे, तर दक्षिण आफ्रिका दुसऱ्या स्थानावर आहे