Mohammad Siraj Won Best Fielder Award : भारत आणि दक्षिण आफ्रिका यांच्यातील तीन सामन्यांची टी-२० आंतरराष्ट्रीय मालिका गुरुवारी पार पडली. दुसऱ्या सामन्यातील पराभवानंतर भारतीय संघाने शेवटच्या सामन्यात चांगली कामगिरी करत मालिका १-१ अशी बरोबरीत सोडवण्यात यश मिळवले. या मालिकेदरम्यान सूर्यकुमार यादवच्या नेतृत्वाखाली युवा खेळाडूंची कामगिरी वाखाणण्याजोगी होती. सामन्यादरम्यान यशस्वी जैस्वाल आणि रिंकू सिंग या खेळाडूंनी फलंदाजीसोबतच क्षेत्ररक्षणात महत्त्वपूर्ण योगदान दिले.
विश्वचषकादरम्यान सुरू झालेली सर्वोत्कृष्ट क्षेत्ररक्षकाला पदक देण्याची प्रथा अजून सुरुच आहे. यावेळी एकूण तीन खेळाडू शर्यतीत सहभागी झाले होते, मात्र मोहम्मद सिराजला सर्वोत्कृष्ट क्षेत्ररक्षणाचे पदक पटकावण्यात यश आले. सिराजशिवाय यशस्वी आणि रिंकू सिंग यांचीही नावे शर्यतीत सामील होती.
शेवटच्या सामन्यानंतर भारतीय क्षेत्ररक्षण प्रशिक्षकाने सर्व खेळाडूंना ड्रेसिंग रूममध्ये एकत्र केले. यावेळी सिराजचे कौतुक करून त्याला पदक देण्यात आले. बीसीसीआयने आपल्या अधिकृत एक्स अकाउंटवरून या सुंदर क्षणाचा फोटोही शेअर केला आहे. शेअर केलेल्या फोटोमध्ये सिराज आणि टी दिलीप एकत्र दिसत आहेत.
टी-२० मालिकेतील सिराजची कामगिरी –
दक्षिण आफ्रिकेविरुद्धच्या टी-२० मालिकेत मोहम्मद सिराजची कामगिरी त्याच्या प्रतिमेनुसार काही खास नव्हती. दुसऱ्या टी-२० सामन्यात त्याने २७ धावा खर्च करून केवळ एकच विकेट मिळवली, तर तिसऱ्या सामन्यात त्याने १३ धावा खर्च केल्या, पण त्याला एकही विकेट मिळाली नाही. फलंदाजी करताना त्याला गेल्या सामन्यात नाबाद दोन धावा करण्यात यश आले. मात्र, या दरम्यान त्याने आपल्या क्षेत्ररक्षणाने सर्वांचे लक्ष वेधून घेतले.
हेही वाचा – T20 World Cup 2024 : ठरलं! ‘या’ शहरात रंगणार भारत-पाकिस्तान यांच्यातील महामुकाबला
भारत आणि दक्षिण आफ्रिका यांच्यातील तीन सामन्यांच्या टी-२० मालिकेतील तिसरा आणि शेवटचा सामना गुरुवारी (१४ डिसेंबर) खेळला गेला. जोहान्सबर्गच्या न्यू वांडरर्स स्टेडियमवर दक्षिण आफ्रिकेचा कर्णधार एडन मार्करामने नाणेफेक जिंकून गोलंदाजी करण्याचा निर्णय घेतला होता. भारताने २० षटकांत सात विकेट गमावून २०१ धावा केल्या. प्रत्युत्तरात आफ्रिकेचा संघ १३.५ षटकांत ९५ धावांत गारद झाला. भारताने हा सामना १०६ धावांनी जिंकला. पहिला सामना पावसामुळे रद्द झाला होता. दुसरा सामना दक्षिण आफ्रिकेने जिंकला. आता तिसरा सामना भारताने जिंकला. अशाप्रकारे तीन सामन्यांची मालिका १-१ अशी बरोबरीत संपली.
