MI vs GG: मुंबई गुजरात विरुद्ध अपराजित! हरमनप्रीतचं वादळ अन् MIने WPL मघ्ये घडवला इतिहास

मुंबई इंडियन्सला हा सामना जिंकण्यासाठी १९३ धावा करायच्या होत्या. या धावांचा पाठलाग करण्यासाठी आलेल्या मुंबई इंडियन्सला सुरुवातीलाच मोठा धक्का बसला जी कमलिनी १३ धावा करत माघारी परतली. तर हेली मॅथ्यूज २२ धावा करून माघारी परतली. तिसऱ्या क्रमांकावर फलंदाजीला आलेल्या अमेलिया केरने ४० धावा केल्या.

मुंबई इंडियन्सची कर्णधार हरमनप्रीत कौर शेवटपर्यंत उभी राहिली. तिने ४३ चेंडूंचा सामना करत नाबाद ७१ धावांची खेळी केली. या खेळीदरम्यान तिने ७ चौकार आणि २ षटकार खेचले. तिला निकोला कॅरीने चांगली साथ दिली. तिने २३ चेंडूंचा सामना करत नाबाद ३८ धावांची खेळी केली. या खेळीचदरम्यान तिने ६ चौकार मारले. शेवटच्या षटकात हरमनप्रीत कौरने चौकार मारून मुंबई इंडियन्सला या हंगामातील दुसरा सामना जिंकून दिला. या खेळीदरम्यान हरमनप्रीत कौरने महिला प्रीमियर लीग स्पर्धेत १००० धाव पूर्ण करण्याचा पराक्रम केला आहे.

गुजरात जायंट्सने ठेवले १९३ धावांचे आव्हान

या सामन्यात मुंबई इंडियन्सने नाणेफेक जिंकून गुजरातला प्रथम फलंदाजी करण्याचे आमंत्रण दिले होते. गुजरातकडून डावाची सुरुवात करण्यासाठी आलेल्या बेथ मुनीने ३३ धावा केल्या. सोफी डिवाईनने ८ धावा केल्या. तर कहीका अहुजाने ३५ धावा केल्या. तर ॲशले गार्डनरने २० धावा केल्या. शेवटी जॉर्जिया वेहरहॅमने नाबाद ४३ धावा केल्या. यादरम्यान तिने ४ चौकार आणि १ षटकार खेचला. आयुषी सोनी ११ धावा करून रिटायर्ड हर्ट होऊन माघारी परतली. भारती फुलमालीने शेवटी ३ चौकार आणि ३ षटकारांचा साहाय्याने ३६ धावा केल्या. यासह गुजरात जायंट्सने ५ गडी बाद १९२ धावा केल्या.