‘त्याला’ इंग्लंडमध्ये अचानक बोलावून खेळवणं हा कसोटी क्रिकेटचा अपमान, इंग्लंडच्या माजी कर्णधाराने दिला सेहवागचा दाखला

पाकिस्तानचा संघ इंग्लंड दौऱ्यावर आहे. दोन कसोटीत पराभूत झाल्यानंतर पाकिस्तान क्रिकेट बोर्डाने ७ खेळाडूंना मायदेशी पाठवण्याचा अनाकलनीय निर्णय घेतला. याबरोबरीने दोन प्रशिक्षकांनाही नारळ दिला. नव्याने निवड झालेल्या खेळाडूंमध्ये सईम अयुबचाही समावेश होता. सईम बर्मिंगहॅम कसोटीत दोन्ही डावात भोपळाही फोडू शकला नाही. यासंदर्भात नासिर हुसेन यांनी भाष्य केलं.

‘सईम अयुबला इंग्लंडमध्ये आणण्याची गरजच नव्हती. तो कॅरेबियन प्रीमिअर लीग स्पर्धेत खेळत होता. टी२० लीगमध्ये आक्रमक पद्धतीने खेळावं लागतं. तिथून थेट इंग्लंडमध्ये अतिशय वेगळ्या वातावरणात त्याला खेळायला लावणं चुकीचं होतं. तो गेले अनेक महिन्यात फर्स्टक्लास क्रिकेट खेळलेला नाही. त्याला वेस्ट इंडिजमधून इंग्लंडमध्ये बोलावण्याचा निर्णय कुणाचा हे मला माहिती नाही पण यात काहीच शहाणपण दिसत नाही. इंग्लंडमध्ये ढगाळ वातावरणात ड्यूक चेंडू स्विंग होत असताना खेळणं सोपं नाही. इंग्लंडचे गोलंदाज दमदार फॉर्मात आहेत. सईमला बोलावणं हा कसोटी क्रिकेटचा अपमानच आहे. कसोटी प्रकार हा अत्यंत कठीण प्रकार आहे. या प्रकारात खेळण्यासाठी शारीरिक आणि मानसिकदृष्ट्या कणखर असावं लागतं. सईमला अचानक बोलावून पाकिस्तान क्रिकेट बोर्डाने कसोटी क्रिकेटचा अपमानच केला’, असं हुसेन यांनी म्हटलं आहे.

सईमच्या संदर्भात बोलताना हुसेन यांनी वीरेंद्र सेहवागचं उदाहरण दिलं. ‘२०११ मालिकेत भारतीय संघाची इंग्लंड दौऱ्यातील कामगिरी सर्वसाधारण होती. त्यावेळी वीरेंद्र सेहवागला बोलावण्यात आलं. सईमच्या तुलनेत सेहवागकडे अनुभव होता. मात्र अचानक इंग्लंडमध्ये येऊन खेळणं त्यालाही कठीण गेलं. तो दोन्ही डावात शून्यावर बाद झाला’.

‘सईमला बोलावणं जसं चूक आहे तसंच त्याने खेळलेले फटकेही त्याच्या विकेटसाठी कारणीभूत आहेत. पण एकंदरीत हा प्रकार पाकिस्तान क्रिकेटमधला सावळागोंधळ दर्शवतो’, असं हुसेन म्हणाले.

२४वर्षीय अयुबने ८ कसोटी, १७ वनडे आणि ६७ टी२० सामन्यात पाकिस्तानचं प्रतिनिधित्व केलं आहे. वनडेत त्याची कामगिरी चांगली झाली आहे. टी२० प्रकारात फटकेबाजी करण्याच्या प्रयत्नात तो विकेट गमावताना दिसतो. कसोटी प्रकारात मोठी खेळी करणं त्याला जमलेलं नाही. पाकिस्तान सुपर लीगच्या बरोबरीने तो कॅरेबियन प्रीमिअर लीग, बांगलादेश प्रीमिअर लीगमध्ये खेळतो.

तिसऱ्या कसोटीत पाकिस्तानचा पहिला डाव १३३ धावांतच आटोपला. इंग्लंडने ४५३ धावा करत मोठी आघाडी मिळवली. पाकिस्तानने दुसऱ्या डावात ४४९ धावा करत चांगला प्रतिकार केला. माजी कर्णधार शान मसूदने ९५ धावांची सुरेख खेळी केली. कर्णधार बाबर आझमने ७६ धावा केल्या. सलामीवीर अझान अवेसने ५९ तर मोहम्मद अब्बासने ४२ धावा केल्या. रझाउल्ला-अब्बास जोडीने ९व्या विकेटसाठी १२१ धावांची शानदार भागीदारी रचली. डॅन लॉरेन्सने रझाउल्लाची खेळी संपुष्टात आणली. इंग्लंडतर्फे गस अॅटकिन्सनने ३ विकेट्स घेतल्या. इंग्लंडला विजयासाठी १३० धावा करायच्या आहेत.