Neeraj Chopra compete Diamond League Final with fractured hand: नीरज चोप्राचे डायमंड लीग २०२४ चे विजेतेपद फक्त एक सेंटीमीटरने हुकले. अंतिम फेरीत त्याने ८७.८६ मीटर सर्वोत्तम थ्रो केला आणि दुसरा क्रमांक पटकावला. ग्रेनेडाच्या अँडरसन पीटर्सने पहिला क्रमांक पटकावला, त्याने ८७.८७ मीटरचा सर्वोत्तम थ्रो केला. नीरजचे चॅम्पियन होण्याचे स्वप्न थोड्या फरकाने भंगले. नीरजने २०२२ मध्ये डायमंड लीग फायनलचे विजेतेपद पटकावले आणि २०२३ मध्ये तो तिसऱ्या स्थानावर होता. आता त्याने जेतेपद न जिंकण्याचे मोठे कारण सांगितले आहे.
डायमंड लीगचं जेतेपद कशामुळे हुकलं?
नीरज चोप्राने सोशल मीडिया प्लॅटफॉर्म एक्सवर एक पोस्ट शेअर करत लिहिले की, “२०२४ चा सीझन संपला आहे. मी वर्षभरात शिकलेल्या सर्व गोष्टींकडे मागे वळून पाहतो. सुधारणा, अपयश, मानसिकता आणि बरेच काही याबद्दल. सोमवारी सरावाच्या वेळी माझ्या हाताला दुखापत झाली आणि माझ्या डाव्या हाताला चौथ्या मेटाकार्पलमध्ये फ्रॅक्चर झाल्याचे एक्स-रेमध्ये दिसून आले. या नव्या दुखापतीमुळे माझ्यासमोर वेगळे आव्हान उभे राहिले होते. मात्र, माझ्या चमूच्या मदतीमुळे आणि प्रोत्साहनामुळे हात फ्रॅक्चर असूनही मी अंतिम फेरीत सहभागी होऊ शकलो..”
नीरज पुढे म्हणाला, “ही वर्षातील शेवटची स्पर्धा होती आणि मला माझा हंगाम चांगल्या ट्रॅकवर संपवायचा होता. जरी मी माझ्या अपेक्षेनुसार कामगिरी करू शकलो नाही, मला वाटते की हा एक असा हंगाम होता ज्यामध्ये मी खूप काही शिकलो. मी पूर्णपणे तंदुरुस्त होऊन पुनरागमन करण्यास तयार आहे. तुमच्या पाठिंब्याबद्दल मी तुम्हा सर्वांचे आभार मानू इच्छितो. २०२४ ने मला एक चांगला खेळाडू आणि व्यक्ती बनवले आहे. २०२५ मध्ये भेटू.”
भारतासाठी भालाफेकमध्ये दोन ऑलिम्पिक पदकं जिंकणारा खेळाडू
नीरज चोप्राच्या या पोस्टवरून हे स्पष्ट होते की तो फ्रॅक्चर असलेल्या हाताने अंतिम फेरीत खेळला होता आणि दुखापतीमुळे तो आपली सर्वोत्तम कामगिरी करू शकला नाही. अंतिम फेरीत नीरजचे तीन थ्रो ८५ मीटरपेक्षा कमी होते. भालाफेकमध्ये दोन ऑलिम्पिक पदकं जिंकणारा चोप्रा हा पहिला भारतीय खेळाडू आहे. त्याने टोकियो २०२० मध्ये सुवर्ण पदक आणि पॅरिस २०२४ मध्ये रौप्य पदक जिंकले. नीरजने वर्ल्ड चॅम्पियननशिपचेही जेतेपद पटकावले आहे. त्याचा बेस्ट थ्रो ८९.९४ मी आहे.
