‘मद्यपान करून कुटुंबाला शिवीगाळ’; नीरज चोप्रा आणि सुमित अंतिलचे प्रशिक्षक नवल सिंग यांच्यावर गंभीर आरोप; नेमकं प्रकरण काय?

पॅरालिम्पिक स्पर्धेतील पदकविजेता सुमित म्हणाला, त्याला कुठल्याही वादात अडकायचं नव्हतं, पण प्रशिक्षकांनी आपल्या मर्यादा ओलांडल्याने त्याला व्यक्त व्हावं लागलं. त्याने आपल्या प्रशिक्षकांना समजवण्याचा प्रयत्न केला. पण त्यांनी समजून घेतलं नाही. ते मद्यपान करुन खेळाडूंना शिवीगाळ करतात, असे धक्कादायक आरोप सुमितने केले आहेत. त्याला नीरज चोप्राची साथ मिळाली आहे.

द ब्रिजच्या वृत्तानुसार, नीरज चोप्रा आणि सुमित अंतिलसह अन्य काही खेळाडूंनी स्पोर्ट्स अथॉरिटी ऑफ इंडियाला (SAI) पत्र लिहिलं आहे. नवल सिंग यांनी अभद्र भाषेचा वापर केल्याचा आरोप देखील करण्यात आला आहे. सुमितने आपल्या पत्रात लिहिले की, “मी याआधी कुठल्याही वादात अडकलेलो नाही. मला कोणत्याही वादात पडायची इच्छा नाही. मी प्रशिक्षकांना अनेकदा समजावण्याचा प्रयत्न केला, पण आता माझ्या सहनशीलतेचा अंत झाला आहे. स्पर्धा सुरु असताना, प्रशिक्षक मद्यपान करुन रेकॉर्डिंग पाठवतात. ज्यामध्ये खेळाडूंना आणि त्यांच्या कुटुंबांना शिवीगाळ केली जाते. यामध्ये आई- बहिणींच्या सन्मानालाही ठेस पोहोचवली जाते.”

सुमित अंतिलला ऑलिम्पिक सुवर्णपदकविजेता नीरज चोप्राने देखील साथ दिली आहे. नीरजने SAI ला इमेल केला आहे. या इमेल द्वारे त्याने कारवाईची मागणी केली आहे. नीरजने लिहिले की, “एक खेळाडू म्हणून मी सांगू इच्छितो की, खेळामध्ये शिस्त, आदर आणि प्रतिष्ठा असणं खूप गरजेचं आहे. प्रशिक्षक नवल सिंग यांनी केलेलं विधान केवळ चुकीचं नाही, तर अत्यंत लाजीरवाणं आहे. मी सर्व खेळाडूंच्या पाठीशी उभा आहे.” भालाफेकपटूंनी SAI कडे तक्रार केली असून ऑडियो रेकॉर्डिंग देखील पाठवले आहेत. ज्यात नवल सिंग नीरज चोप्रा, सुमित अंतिल, नवदीप सिंग आणि पाकिस्तानचा खेळाडू अर्शद नदीमला शिवीगाळ करत आहेत.