NZ vs CAN: न्यूझीलंडचा सुपर ८ मध्ये प्रवेश! कॅनडाच्या पराभवानंतर ‘हा’ संघ वर्ल्डकपमधून बाहेर

युवराज सामराचं शतक व्यर्थ

या सामन्यात कॅनडाने नाणेफेक जिंकून प्रथम फलंदाजी करण्याचा निर्णय घेतला होता. प्रथम फलंदाजी करताना कॅनडाकडून सलामीला आलेल्या युवराज सामराने ६५ चेंडूत ११ चौकार आणि ६ षटकारांच्या साहाय्याने ११० धावांची खेळी केली. तर कर्णधार दिलप्रीत बाजवाने ३९ चेंडूत ३६ धावा केल्या. नवजीत धलीवालने १० धावा केल्या. या खेळीच्या बळावर कॅनडाने ४ गडी बाद १७३ धावा केल्या.

न्यूझीलंडला हा सामना जिंकण्यासाठी १७४ धावा करायच्या होत्या. या धावांचा पाठलाग करताना न्यूझीलंडला लागोपाठ २ मोठे धक्के बसले. संघाची धावसंख्या ३० धाव असताना आधी टीम सेफर्ट ६ अवघ्या ६ धावा करत माघारी परतला. तर फिल अॅलेने २१ धावा करत माघारी परतला. त्यानंतर रचिन रवींद्रने आणि ग्लेन फिलिप्सची जोडी शेवटपर्यंत मैदानावर टिकून राहिली. दोघांनी मिळून १४६ धावांची भागीदारी करून न्यूझीलंडला विजय मिळवून दिला. यादरम्यान रचिन रवींद्रने ३९ चेंडूत ४ चौकार आणि ३ षटकारांच्या साहाय्याने नाबाद ५९ धावांची खेळी केली. तर ग्लेन फिलिप्सने ३६ चेंडूंचा सामना करत ४ चौकार आणि ६ षटकारांच्या साहाय्याने नाबाद ७६ धावांची खेळी केली.

न्यूझीलंडचा सूपर ८ मध्ये प्रवेश

या विजयासह न्यूझीलंडने सुपर८ मध्ये प्रवेश केला आहे. न्यूझीलंडचा संघ टी-२० वर्ल्डकप २०२६ स्पर्धेतील सुपर ८ फेरीत प्रवेश करणारा सहावा संघ ठरला आहे. या विजयासह कॅनडा आणि अफगाणिस्तानचा संघ देखील स्पर्धेतून बाहेर पडला आहे. न्यूझीलंडने या स्पर्धेतील ४ पैकी ३ सामने जिंकले आहेत. ६ गुणांसह हा संघ दुसऱ्या स्थानी आहे.