जागतिक विजेत्या लवलिना बोरगोहेनने ७५ किलो प्रकारात अंतिम फेरी गाठताना सलग दुसऱ्या वर्षी बॉिक्सगमध्ये ऑलिम्पिकचे तिकीट मिळवले. त्याच वेळी युवा खेळाडू प्रीतीला (५४ किलो) कांस्यपदकावर समाधान मानावे लागले. नरेंदरलाही ९२ किलोपेक्षा अधिक वजनी गटात कांस्यपदकावर समाधान मानावे लागले. टोक्यो ऑलिम्पिक स्पर्धेत कांस्यपदक मिळविणाऱ्या लवलिनाने आशियाई स्पर्धेतील रौप्यपदक विजेत्या थायलंडच्या बेसन मनिकोनविरुद्धची लढत अधिक सहज जिंकताना अंतिम फेरी गाठली.
प्रीतीने आपल्या लढतीत प्रयत्नांची पराकाष्ठा केली; पण गतविजेत्या चीनच्या चँग युआनचे आव्हान मोडून काढण्यात प्रीती उपयशी ठरली. उपांत्य लढतीत प्रीतीला ०-५ असा एकतर्फी पराभव पत्करावा लागला. दोघींनी कमालीचा आक्रमक खेळ केला. फरक इतकाच होता की, चँगचे ठोसे प्रीतीच्या शरीरावर नेमके बसले, तर प्रीतीच्या ठोशांना हुलकावणी देण्यात चँग यशस्वी ठरली. लढतीत एक वेळ अशी आली होती की, १९ वर्षीय प्रीतीचे डबल जॅब, उजव्या हाताचे हूकचे दोन आणि शरीराचा वेध घेणारे दोन फटके अचूक बसले; पण त्यानंतर चँगने दाखवलेली आक्रमकता तिचे गतविजेतेपद सिद्ध करणारी ठरली.
ऑलिम्पिक पदकविजेती लवलिनाला विजयासाठी फारसे कष्ट पडले नाहीत. अचूक नियोजनबद्ध खेळ करत लवलिनाने प्रतिस्पर्धीस फारशी संधीच दिली नाही. दरम्यान पुरुषांच्या ५७ किलो वजनी गटाच्या उपांत्यपूर्व लढतीत भारताच्या सचिन सिवचला चीनच्या ल्यु पिंगकडून १-४ असा पराभव पत्करावा लागला. पाठोपाठ ९२ किलोपेक्षा अधिक वजनी गटात नरेंदरला कांस्यपदकावर समाधान मानावे लागले. उपांत्य लढतीत नरेंदरला कझाकस्तानच्या कुन्काबाएव कामशीबेककडून एकतर्फी लढतीत पराभव पत्करावा लागला.
