टोक्यो ऑलिम्पिकमध्ये शुक्रवारी भारतीय महिला हॉकी संघाला पुरुषांप्रमाणेच ऐतिहासिक कामगिरी करण्यात अपयश आलं. रिओ ऑलिम्पिक सुवर्णपदक विजेत्या ब्रिटनच्या संघाने भारतीय महिला संघाला ४-३ ने पराभूत करत कांस्यपदकावर आपलं नाव कोरलं. हा पराभव भारतीय महिला खेळाडूंच्या जिव्हारी लागला आणि त्या सामन्यानंतर मैदानामध्येच रडू लागल्या. भारतीय हॉकी चाहत्यांनाही महिलांच्या या पराभवावर निराशा व्यक्त करतानाच हरकत नाही २०२४ च्या पॅरिस ऑलिम्पिकमध्ये जिंकू असं म्हणत त्यांना सोशल नेटवर्किंगवरुन धीर दिलाय. असं असतानाच दुसरीकडे भारतीय महिला हॉकी संघाचे प्रशिक्षक शोर्ड मरिन यांनीही ट्विटवरुन या पराभवानंतर आपल्या भावनांना वाट मोकळी करुन दिलीय. आम्ही पदक जिंकलो नसलो तरी भारतीयांना अभिमान वाटावा अशी कामगिरी केल्याचा आनंद आहे असं मरिन म्हणालेत. नक्की पाहा हे फोटो >> Olympics: भारतीय महिला खेळाडू पराभवानंतर रडू लागल्या तेव्हा मरिन गुरुंनी अशापद्धतीने दिला आधार "आम्ही पदक जिंकलो नाही. मात्र माझ्या मते आम्ही त्याहून फार मोठं काहीतरी जिंकलं आहे. आम्ही सर्व भारतीयांना अभिमान वाटावा अशी कामगिरी करुन भारतातील लाखो मुलींना संदेश दिलाय की स्वप्न खरी होऊ शकतात जोपर्यंत तुमची कष्ट करण्याची इच्छा आहे आणि तुमचा त्या स्वप्नावर विश्वास आहे. तुम्ही दिलेल्या पाठिंब्यासाठी धन्यवाद," असं ट्विट मरिन यांनी केलं आहे. सामना संपल्यानंतर भारतीय महिला खेळाडू मैदानातच रडू लागल्याने मरिन हे त्यांना आधार देतानाचे फोटो सोशल नेटवर्किंगवर व्हायरल झालेत. We did not win a medal, but I think we have won something bigger. We have made Indians proud again and we inspired millions of girls that dreams CAN come true as long as you work hard for it and believe it! Thanks for all the support! — Sjoerd Marijne (@SjoerdMarijne) August 6, 2021 शाहरुखचाही खास संदेश २ ऑगस्ट रोजी भारतीय संघाने ऑस्ट्रेलियन संघाला १-० च्या फरकाने पराभूत करुन उपांत्यफेरीत प्रवेश केल्यापासूनच सोशल नेटवर्किंगवर शाहरुखची चर्चा आहे. शाहरुखने ज्याप्रमाणे 'चक दे इंडिया' चित्रपटामध्ये महिला संघाला पदक जिंकून दिलं तिच कथा प्रत्यक्षात साकारताना पहायला मिळणार असल्याचं सांगत अनेकांनी भारतीय महिला संघाचे प्रशिक्षक शोर्ड मरिन यांची तुलना कबीर खान या शाहरुखने साकारलेल्या पात्राशी केली. शाहरुखनेही भारतीय संघाने सुवर्णपदक जिंकावं अशी इच्छा या विजयानंतर बोलून दाखवली होती. मात्र आता भारत कांस्यपदकाच्या सामन्यात पराभूत झाल्यानंतर शाहरुखने भारतीय महिलांना धीर दिलाय. नक्की पाहा >> ‘कबीर खान’शी होतेय भारतीय महिला हॉकी संघाच्या प्रशिक्षकांची तुलना… पण त्यांचं एका महिन्याचं मानधन पाहून चक्रावून जाल "हे हार्टब्रेकींग आहे. मात्र तरीही आपण आपली मान गर्वाने उंचवू शकतो. भारतीय महिला हॉकी संघ फार छान खेळला. तुम्ही भारतातील प्रत्येकाला प्रेरणा दिलीय. तुम्ही दिलेली ही प्रेरणा म्हणजेच विजय आहे," असं शाहरुख ट्विटरवरुन म्हणालाय. Heartbreak!!! But all reasons to hold our heads high. Well played Indian Women’s Hockey Team. You all inspired everyone in India. That itself is a victory. — Shah Rukh Khan (@iamsrk) August 6, 2021 भारतीय महिला संघाने २ ऑगस्ट रोजी बलाढ्य ऑस्ट्रेलियन संघाला धूळ चारल्यानंतर शोर्ड मरिन यांना अश्रू अनावर झाले होते. ते मैदानातच रडू लागले. त्यानंतर त्यांचे अनेक फोटो व्हायरल झालं. मात्र नंतर शोर्ड यांनीच भारतीय महिला संघासोबतचा एक सेल्फी पोस्ट केला. त्यांनी या फोटोला एक मजेदार कॅप्शनही दिली होती. “कुटुंबियांनो मला माफ करा, घरी येण्यासाठी मला आणखीन काही कालावधी लागेल,” अशा कॅप्शनसहीत शोर्ड मरिन यांनी भारतीय महिला संघासोबतचा सेल्फी पोस्ट केला होता. म्हणजेच आता भारतीय महिला संघ पुढील फेरीत गेल्याने आपल्याला आणखीन काही काळ संघासोबत थांबावं लागणार असल्याचं शोर्ड यांनी मजेदार पद्धतीने सांगितलं होतं. तसेच त्यांनी कुटुंबियांची माफीही मागितलीय. Sorry family , I coming again later pic.twitter.com/h4uUTqx11F — Sjoerd Marijne (@SjoerdMarijne) August 2, 2021 या सामन्यानंतर शाहरुखने साकारलेल्या कबीर खान या भूमिकेशी शोर्ड यांची तुलना होत असतानाच शाहरुखनेही या मजेदार कॅप्शनसहीत पोस्ट केलेल्या फोटोवर प्रतिक्रिया दिली होती. शाहरुखने हे ट्विट कोट करुन रिट्विट केलं होतं. "होय काही हरकत नाही फक्त येताना घरी कोट्यावधी कुटुबियांसाठी थोडं गोल्ड (सुवर्णपदक) घेऊन या. यंदा धनत्रयोदशी २ नोव्हेंबरलाच (माझ्या वाढदिवसाच्या दिवशीच) आहे. माजी प्रशिक्षक कबीर खानकडून." असं शाहरुखने ट्विटमध्ये म्हटलं होतं. त्याने धनत्रयोदशीला सोन्याची आणि लक्ष्मीची पुजा केली जाते हा संदर्भही सुवर्णपदकाशी आणि स्वत:च्या वाढदिवसाशीही जोडलेला. म्हणजेच गोल्डच्या स्वरुपात तुम्ही ही लाखमोलाची भेट भारतीयांना द्या आणि मलाही माजी प्रशिक्षक म्हणून सप्राइज द्या, असा संदेशच शाहरुखने भारतीय महिला हॉकी संघाच्या प्रशिक्षकांना दिला होता. Haan haan no problem. Just bring some Gold on your way back….for a billion family members. This time Dhanteras is also on 2nd Nov. From: Ex-coach Kabir Khan. — Shah Rukh Khan (@iamsrk) August 2, 2021 कोण आहेत शोर्ड मरिन? शोर्ड मरिन हे मूळचे नेदरलँड्सचे आहेत. शोर्ड हे २००३ पासून वेगवेगळ्या संघांना हॉकीचं प्रशिक्षण देत आहेत. त्यांना कोच म्हणून १८ वर्षांहून अधिक काळाचा अनुभव आहे. मागील तीन वर्षांपासून म्हणजेच २०१८ च्या मध्यापासून ते भारतीय महिला संघाचे प्रशिक्षक आहेत. २०१७ ते २०१८ दरम्यान शोर्ड मरिन हे भारतीय पुरुष हॉकी संघाचे प्रशिक्षक होते.