पाकिस्तानी हल्ल्यात ४०० हून अधिक जणांचा मृत्यू; अफगाण क्रिकेटपटू संतप्त, राशिद खानचा ‘युद्धगुन्ह्याचा’ आरोप

अफगाणिस्तानच्या आरोग्य मंत्रालयाचे प्रवक्ते शराफत जमान यांनी सांगितलं की काबुल या ठिकाणी नशामुक्ती केंद्र असलेल्या एका रुग्णालयावर हल्ला करण्यात आला. या हल्ल्यात अनेक निष्पाप लोकांचा मृत्यू झाला आहे.

अफगाणिस्तानचा स्टार फिरकी गोलंदाज रशीद खानने सोशल मीडियावर एका पोस्टद्वारे आपलं दुःख व्यक्त केलं. त्याने लिहिलं, “काबूलमधील पाकिस्तानी हवाई हल्ल्यात झालेल्या नागरिकांच्या मृत्यूच्या बातमीने मला खूप दुःख झालं आहे. नागरिकांची घरे, शैक्षणिक संस्था किंवा वैद्यकीय पायाभूत सुविधांना, जाणूनबुजून किंवा अपघाताने लक्ष्य करणं हा एक युद्धगुन्हा आहे. मानवी जीवनाप्रती अशी असंवेदनशीलता, विशेषतः रमजानच्या पवित्र महिन्यात, अत्यंत चिंताजनक आहे. यामुळे केवळ द्वेष आणि फूट वाढेल.”

रशीद खानने पुढे लिहिलं, “मी संयुक्त राष्ट्र आणि मानवाधिकार संघटनांना आवाहन करतो की त्यांनी या घटनेची सखोल चौकशी करून दोषींना जबाबदार धरावे. या कठीण काळात मी माझ्या अफगाण लोकांसोबत उभा आहे. आपण यातून सावरू आणि एक राष्ट्र म्हणून पुन्हा उभे राहू.”

अफगाणिस्तान संघाचा दिग्गज खेळाडू मोहम्मद नबीने जखमी आणि मृतांना स्ट्रेचरवरून रुग्णालयात नेले जात असल्याचा एक व्हिडिओ शेअर केला आहे. त्याने लिहिलं, “आज रात्री काबूलमधील एका रुग्णालयात आशेचा किरण मावळला. व्यसनाधीनतेतून दिलासा शोधणारे तरुण पाकिस्तानी लष्कराच्या बॉम्बहल्ल्यात मारले गेले. दारात उभ्या असलेल्या आई आपल्या मुलांसाठी आक्रोश करत होत्या, पण रमजानच्या २८ व्या रात्री त्यांचे आयुष्य अकाली संपले.”

दरम्यान, अझमतुल्ला उमरझाईने पोस्ट शेअर करत लिहिलं, “आज रात्री काबूलमध्ये एका मोठ्या स्फोटाने हादरवून सोडलं. रुग्णालयातून आगीच्या ज्वाला उसळल्या. रमजान महिन्यात, रोजा सोडल्यानंतर अनेक निष्पाप लोकांनी आपले प्राण गमावले आणि अनेक जण जखमी झाले.”