सातत्याने असातत्यपूर्ण खेळण्यासाठी कुप्रसिद्ध पाकिस्तानची इंग्लंड दौऱ्यातल्या पहिल्या टेस्टमध्ये दाणादाण उडाली. लीड्स येथे आजपासून सुरू झालेल्या पहिल्या टेस्टमध्ये इंग्लंडने टॉस जिंकून बॉलिंगचा निर्णय घेतला. ढगाळ वातावरणाचा फायदा उठवत ऑली रॉबिन्सन आणि जोश टंग यांनी पाकिस्तानच्या डावाला खिंडार पाडलं. पाकिस्तानचा डाव ४८.१ ओव्हरमध्येच गडगडला.
पाकिस्तानला या टेस्टच्या पूर्वसंध्येला धक्का बसला. दुखापतीतून न सावरल्याने कर्णधार बाबर आझम या सामन्यात खेळू शकणार नाही हे स्पष्ट झालं. बाबरच्या अनुपस्थितीत सलमान अली अघाकडे नेतृत्वाची धुरा सोपवण्यात आली. काही दिवसांपूर्वीच आटोपलेल्या वेस्ट इंडिज दौऱ्यात बाबरने चांगली कामगिरी केली होती.
इंग्लंडचा नवा कर्णधार जो रूटने टॉस जिंकून बॉलिंगचा निर्णय घेतला. इंग्लंडच्या गोलंदाजांनी अचूक टप्प्यावर गोलंदाजी करत हा निर्णय सार्थ ठरवला. ओली रॉबिन्सनने ५१ धावांत ५ तर जोश टंगने ४६ धावांत ५ विकेट्स पटकावल्या. या दोघांनी नियमित अंतरात विकेट्स घेत पाकिस्तानच्या फलंदाजांना स्थिरावू दिलं नाही. पाकिस्तानतर्फे अब्दुला शफीकने सर्वाधिक ६१ धावांची खेळी केली.
इंग्लंड संघांसाठी ही मालिका एक नवी सुरुवात आहे. नाईटक्लब प्रकरणी एका सामन्यासाठी बंदीची कारवाई सोसल्यानंतर बेन स्टोक्सने आंतरराष्ट्रीय क्रिकेटला अलविदा करण्याचा निर्णय घेतला. स्टोक्सच्या निर्णयानंतर इंग्लंड क्रिकेट बोर्डाने प्रशिक्षक ब्रेंडन मॅक्युलम यांच्याकडून टेस्ट संघाचं प्रशिक्षकपद काढून घेतलं. मॅक्युलम यांच्या मार्गदर्शनात इंग्लंड संघाने बॅझबॉल अर्थात अतिआक्रमक पद्धतीने खेळणं अनुसरलं होतं. सुरुवातीला ही पद्धत यशस्वी ठरली मात्र त्यानंतर फाजील आक्रमकतेचा फटका इंग्लंडला बसला. न्यूझीलंडविरुद्धच्या मालिकेत पहिली टेस्ट जिंकल्यानंतर इंग्लंडच्या संघातील खेळाडू नाईटक्लबमध्ये गेले होते. त्यावेळी कर्णधार बेन स्टोक्स आणि वेगवान गोलंदाज गस अॅटकिन्सन यांचं एका रग्बी खेळाडूशी भांडण झालं. प्रकरण हाताबाहेर जाण्याआधी सुरक्षारक्षकांनी हस्तक्षेप केला. यानंतर स्टोक्स आणि अॅटकिन्सनवर कारवाई झाली. तटस्थ निरीक्षकाद्वारे झालेल्या चौकशीत स्टोक्स-अॅटकिन्सन दोषी आढळले नाहीत. तिसऱ्या टेस्टमध्ये दोघेही खेळले. मात्र या टेस्टदरम्यान स्टोक्सने निवृत्तीचा निर्णय जाहीर केला. सार्वकालीन महान अष्टपैलू खेळाडू स्टोक्सच्या निवृत्तीने खळबळ उडाली.
