पाकिस्तानने घेतली वेस्ट इंडिजची ‘फिरकी’; दुसरी टेस्ट जिंकत केली मालिकेत बरोबरी

पोर्ट ऑफ स्पेन इथे आटोपलेल्या दुसऱ्या टेस्टमध्ये पाकिस्तानने ८ विकेट्सनी विजय मिळवला. या विजयासह पाकिस्तानने दोन सामन्यांच्या मालिकेत १-१ अशी बरोबरी केली. अब्दुला शफीकला सामनावीर पुरस्काराने गौरवण्यात आलं.

या टेस्टसाठी पाकिस्तानने तीन बदल केले. पहिल्या टेस्टमध्ये ८ विकेट्स पटकावणाऱ्या अनुभवी मोहम्मद अब्बासला संघातून वगळण्यात आलं. या निर्णयावर जोरदार टीका झाली होती. मात्र खेळपट्टी फिरकीपटूंना साथ देणारी असल्याचा पाकिस्तानचा अंदाज खरा ठरला.

वेस्ट इंडिजने टॉस जिंकून बॅटिंगचा निर्णय घेतला. जस्टीन ग्रीव्ह्ज आणि कर्णधार रॉस्टन चेस यांच्या अर्धशतकांच्या बळावर वेस्ट इंडिजने ३४४ धावांची मजल मारली. पाकिस्तानतर्फे फिरकीपटू साजिद खानने ४ विकेट्स पटकावल्या.

अब्दुल्ला शफीकची नाबाद १६० धावांची खेळी आणि कर्णधार बाबर आझमच्या ८८ धावांच्या खेळीच्या आधारे पाकिस्तानने ३८७ धावांचा टप्पा गाठला. या दोघांच्या भागीदारीनेच पाकिस्तानच्या डावाचा पाया रचला. वेस्ट इंडिजतर्फे फिरकीपटू जोमेल वॉरिकनने ६ विकेट्स घेतल्या. पाकिस्तानला ४३ धावांची अल्प आघाडी मिळाली.

वेस्ट इंडिजच्या फलंदाजांनी पाकिस्तानच्या फिरकीपटूंपुढे शरणागती पत्करली आणि त्यांचा डाव ११७ धावांतच आटोपला. बाबर आझमला रनआऊट करताना दुखापतग्रस्त झालेला ब्रँडन किंग फलंदाजीला येऊ शकला नाही. पाकिस्तानच्या उस्मान अली आणि साजिद खान यांनी प्रत्येकी चार विकेट्स टिपत वेस्ट इंडिजच्या डावाला खिंडार पाडलं. वेस्ट इंडिजच्या खेळपट्या वेगवान गोलंदाजांना पोषक असतात. मात्र या टेस्टमध्ये फिरकीपटूंनीच दबदबा राखला.

वेस्ट इंडिजचा दुसरा डाव झटपट आटोपल्यामुळे पाकिस्तानला जिंकण्यासाठी ७५ धावांचं लक्ष्य मिळालं. हे लक्ष्य गाठतानाही पाकिस्तानने दोन विकेट्स गमावल्या. बाबर आझम आणि अब्दुल्ला शफीक यांनी विजयावर शिक्कामोर्तब केलं. दोघांनी प्रत्येकी २४ धावांची खेळी केली.