प्रो-कबड्डीच्या इतिहासात कट्टर प्रतिस्पर्धी म्हणून ओळख असलेल्या यू मुम्बा विरुद्ध पुणेरी पलटण सामन्यात यू मुम्बाने बाजी मारली आहे. नोएडा येथे झालेल्या सामन्यात यू मुम्बाने पुणेरी पलटणवर 31-22 ने मात करुन याआधी झालेल्या पराभवाचा बदला घेतला. यू मुम्बाच्या संघाने आज अष्टपैलू खेळ केला, मात्र पुणेरी पलटणच्या चढाईपटूंनी आजच्या सामन्यात पुरती निराशा केली, याचाच फटका त्यांना सामन्यात बसला. नितीन तोमरच्या अनुपस्थितीत खेळणाऱ्या पुणेरी पलटण संघाने पहिल्या काही मिनीटांमध्ये आक्रमक खेळ करत आघाडी घेतली. मात्र या धक्क्यातून वेळीच सावरत यू मुम्बाच्या बचावपटूंनी सामन्यात पुनरागमन केलं. फजल अत्राचली, सुरिंदर सिंह यांनी काही सुरेख पकडी केल्या. चढाईत अभिषेक सिंह आणि दर्शन कादियान यांनी मोर्चा सांभाळात संघाच्या खात्यात महत्वाचे गुण टाकले. या जोरावर यू मुम्बाने दमदार पुनरागमन करत पहिल्या सत्राअखेरीस 19-10 अशी आघाडी घेतली. यू मुम्बाने आज आपला महत्वाचा खेळाडू सिद्धार्थ देसाईला विश्रांती दिली होती, मात्र संपूर्ण सामन्यात सिद्धार्थची अनुपस्थिती इतर खेळाडूंनी जाणवू दिली नाही. दुसरीकडे पुणेरी पलटण संघाच्या चढाईपटूंनी मात्र साफ निराशा केली. पहिल्या मिनीटांमध्ये केलेली आक्रमक सुरुवात व त्यातून मिळालेली आघाडी पुण्याला कायम राखता आली नाही. दीपक कुमार दहीया, गुरुनाथ मोरे नंतर यू मुम्बाच्या बचावफळीच्या जाळ्यात अडकत गेले. दुसऱ्या सत्रात अक्षय जाधवने 5 गुणांची कमाई करत मुम्बाला लढत देण्याचा प्रयत्न केला मात्र यामध्ये त्यांना अपयश आलं. दुसऱ्या सत्रात पुण्याच्या बचावपटूंनी मात्र आश्वासक खेळ करत सुपर टॅकलमध्ये 2-2 गुणांची कमाई करत यू मुम्बाच्या आघाडीचं अंतर कमी केलं. मात्र सामन्यात बरोबरी साधण्याचं काम त्यांना करता आलं नाही. या पराभवानंतरही पुणेरी पलटणचा संघ अ गटात गुणतालिकेत 37 गुणांसह पहिल्या तर यू मुम्बाचा संघ 34 गुणांसह दुसऱ्या स्थानावर आहे.
