पीटी उषा यांच्या पतीचे निधन, घरातच चक्कर येऊन पडले अन्…; नेमकं काय घडलं?

शुक्रवारी सकाळी श्रीनिवासन त्यांच्या राहत्या घरी बेशुद्ध होऊन कोसळले आणि त्यानंतर त्यांना लगेचच जवळच्या रुग्णालयात नेण्यात आलं, परंतु डॉक्टर मात्र त्यांना वाचवू शकले नाहीत आणि त्यांची प्राणज्योत मालवली. पंतप्रधान नरेंद्र मोदी यांनी पीटी उषा यांच्याशी फोनवरून संवाद साधला आणि शोक व्यक्त केला.

माजी केंद्रीय सरकारी कर्मचारी असलेले श्रीनिवासन हे पीटी उषा यांच्या त्यांच्या गौरवशाली क्रीडा कारकिर्दीत सतत त्यांच्यासोबत होते. त्यांना त्यांचा आधार आणि त्यांच्या अनेक व्यावसायिक कामगिरीमागील शक्ती म्हणून ओळखलं जात असे. पीटी उषा यांनी १९९१ मध्ये श्रीनिवासन यांच्याशी लग्न केलं. या दोघांनाही विघ्नेश उज्ज्वल नावाचा मुलगा आहे. श्रीनिवासन हे केंद्रीय औद्योगिक सुरक्षा दलातून (CISF) पोलिस उपअधीक्षक म्हणून निवृत्त झाले.

कोण होते व्ही श्रीनिवासन?

व्ही. श्रीनिवासन हे फ्लाइंग फेरी म्हणून ओळखल्या जाणाऱ्या भारतीय धावपटू पी.टी. उषा यांचे पती होते. श्रीनिवासन हे नुकतेच केंद्रीय औद्योगिक सुरक्षा दल (सीआयएसएफ) मधील पोलिस उपअधीक्षक पदावरून निवृत्त झाले होते. पीटी उषा यांनी स्वतः अनेक वेळा सांगितलं आहे की त्यांचे पती त्यांच्या वैयक्तिक आणि व्यावसायिक जीवनातील सर्वात मजबूत आधारस्तंभ आहेत.

श्रीनिवासन यांनी पीटी उषा यांना तिच्या संपूर्ण क्रीडा कारकिर्दीत पाठिंबा दिला आणि उषा स्कूल ऑफ अ‍ॅथलेटिक्सची स्थापना केली. शिवाय, राज्यसभा सदस्य असताना ते नेहमीच त्यांच्या पाठीशी होते. साधे आणि सहज स्वभावाचे असलेले श्रीनिवासन हे कायम पडद्यामागे राहत होते. तरीही त्यांनी खेळांना प्रोत्साहन देण्यात खूप रस घेतला असे म्हटलं जातं.