“सर्वच विराट कोहली नसतात…”, संघाबाहेर असलेला ऋषभ पंत असं का म्हणाला?

बिझनेस ऑफ स्पोर्ट पॉडकास्टमध्ये बोलताना ऋषभ पंत म्हणाला की, “नक्कीच,वाईट वाटतं. पण एक खेळाडू म्हणून एक गोष्ट समजून घ्यावी लागते. ती म्हणजे, जेव्हा अडथळे येतात, तेव्हा पुनरागमनही होतं.” तसेच भारताचा अनुभवी फलंदाज विराट कोहलीचं उदाहरण देताना तो म्हणाला, “एक खेळाडू म्हणून कामगिरीचा आलेख नेहमीच खाली वर जात असतो, सर्वच विराट कोहली नसतात. कारण विराट कोहलीची कारकिर्द खूप असाधारण राहिली आहे.”

शुबमन गिलची कसोटी संघाच्या उपकर्णधारपदी निवड करण्यात आली, त्यावेळी ऋषभ पंत भारतीय कसोटी संघाचा उपकर्णधार होता. पण त्याला उपकर्णधारपदावरून काढून टाकण्यात आलं होतं. कसोटी क्रिकेटमध्ये उफकर्णधारपद गेलं असलं तरीदेखील त्याचं संघातील स्थान कायम आहे. कारण, कसोटी क्रिकेटमध्ये तुफान फटकेबाजी करून सामना फिरवण्यात त्याचा हात कोणीच धरू शकत नाही. अनेकदा त्याने हातून निसटलेल्या सामन्यात भारतीय संघाला विजय मिळवून दिला आहे. सध्या कुठलीही कसोटी मालिका नसल्याने तो इराणी कप स्पर्धा खेळण्यासाठी उतरला आहे.

कसोटी क्रिकेटमध्ये संघात स्थान कायम ठेवायचं असेल, तर त्याला इराणी कपमध्ये धावा कराव्या लागणार आहेत. त्यानंतर तो रणजी ट्रॉफीत दिल्लीकडून खेळताना दिसून येऊ शकतो. येत्या काही दिवसात भारतीय संघ न्यूझीलंड दौऱ्यावर जाणार आहे. हा दौरा देखील भारतीय संघासाठी महत्वाचा असणार आहे. ऋषभ पंतचं लक्ष्य आता वनडे वर्ल्डकप २०२७ स्पर्धेसाठी भारतीय संघात स्थान मिळवणं हेच असणार आहे.जर त्याला या संघात स्थान मिळवायचं असेल, तर देशांतर्गत क्रिकेटमध्ये आणि आयपीएलमध्ये धावांचा पाऊस पाडावा लागणार आहे.