VIDEO: “अरे यार मी फोन घरी विसरलो रे”, तिलकने सांगितला रोहितचा ‘तो’ भन्नाट किस्सा; हसणाऱ्यांना बघून हिटमॅन म्हणाला, “हे जे इथे बसून…”

रोहित शर्मा हॅमस्ट्रिंगच्या दुखापतीनंतर मुंबई इंडियन्सकडून खेळण्यासाठी उतरला आणि ८४ धावांची खेळी करत दणक्यात पुनरागमन केलं. मुंबई इंडियन्स आणि लखनौ सुपर जायंट्स सामन्यात रोहित शर्मा फिटनेस मिळवल्यानंतर खेळण्यासाठी उतरला आणि रायन रिकल्टनसह विजयाचा हिरो ठरला. रोहित शर्मा व रायन रिकल्टन यांनी १४३ धावांची भागीदारी रचत संघाच्या विजयाचा पाया रचला. यानंतर एका कार्यक्रमात मुंबईच्या संघातील काही निवडक खेळाडू पोहोचले होते. या कार्यक्रमातील व्हीडिओ व्हायरल होत आहे.

“अरे यार मी फोन घरी विसरलो”; तिलकने पोलखोल करताच हशा पिकला

मुंबई इंडियन्सचा संघ लखनौविरूद्ध सामन्यापूर्वी मोठा ब्रेकमध्ये जामनगरला गेले होते, जिथे संघाने एकत्र वेळ घालवला. त्यादरम्यानचा रोहितच्या विसरभोळेपणाचा किस्सा तिलकने सांगितला आहे. तिलक म्हणाला, “आम्ही जेव्हा जामनगरला गेलो होतो, तेव्हा मी रोहित भाईला कॉल करत होतो आणि कोणी कॉल उचलत नव्हतं. मग भेटल्यावर मी त्यांना विचारलं, मी तुम्हाला कॉल करत होतो. तेव्हा रोहित भाई म्हणाले, अरे यार मी तर फोन घरी विसरलो रे.”

तिलकने रोहितचा हा किस्सा सांगताच सगळेच जण हसू लागले. त्यानंतर रोहितने माईक उचलला आणि म्हणाला, “मी तर मान्य करतो की मी गोष्टी विसरतो. त्यात काय एवढं, हे सगळे लोक जे इथे बसून हसत आहेत ना हे सगळे काही ना काही विसरतात…” रोहितने एकदम राजा अंदाजात दिलेलं हे उत्तर ऐकून सगळ्यांनी एकच जल्लोष केला.

रोहित शर्मा मुंबई इंडियन्स संघात परतल्याने मुंबईचा संघ अधिक मजबूत झाला आहे. पण सातत्याने सामने गमावल्याने आता मुंबईसमोर चूक करण्याची एकही संधी नाहीये. मुंबई इंडियन्सला आता प्लेऑफ गाठायचं असेल तर उर्वरित सामन्यांमधील सर्व चारही सामने जिंकावे लागणार आहेत. याशिवाय संघाच्या बाजूने इतर संघांचे निकाल लागणंदेखील आवश्यक असणार आहे. मुंबईचे पुढील सामने आता रॉयल चॅलेंजर्स बंगळुरू, पंजाब किंग्स, कोलकाता नाईट रायडर्स आणि राजस्थान रॉयल्स या संघांविरूद्ध होणार आहेत.