Rohit Sharma: टी-२० वर्ल्डकप जिंकण्यासाठी टीम इंडियाला रोहित शर्माचा मोलाचा सल्ला; म्हणाला, ‘मी जे केलं तेच…”

यावेळी भारतीय संघ सूर्यकुमार यादवच्या नेतृत्वाखाली खेळताना दिसणार आहे. एकापेक्षा एक स्टार खेळाडू असलेल्या भारतीय संघाला जेतेपदासाठी प्रबळ दावेदार मानलं जात आहे. दरम्यान ही स्पर्धा सुरू होण्याआधी रोहित शर्माने भारतीय संघाला मोलाचा सल्ला दिला आहे. जियो हॉटस्टारवर बोलताना रोहित शर्मा म्हणाला, ” सोशल मीडियापासून दूर रहा. मी सुद्धा आता सोशल मीडियापासून दूर राहतो. कुठे काय झालंय, हे मला बाहेरून समजतं. हे मला खूप आवडतंय. मी वनडे वर्ल्डकप २०२३ स्पर्धेआधी देखील हेच केलं होतं. कोणी सांगायचा आधीच, मला हे करायचं होतं.”

तसेच तो पुढे म्हणाला की, “तुम्ही जर पाहिलं, तर २०२३ वर्ल्डकप स्पर्धेत आम्ही सर्वोत्तम कामगिरी केली होती. हे फक्त मैदानावर काय केलं यामुळे नव्हतं, तर मैदानाबाहेरील वातावरणामुळेही होतं. आम्ही ते ४५ दिवस एकत्र होतो. आम्ही सर्वांनी एकमेकांसोबत खूप वेळ घालवला. बरेच अॅक्टिव्हिटीज केल्या. एकमेकांसोबत मस्करी केली, फिल्डिंग मेडल दिले. हे मेडल देण्याची सुरूवात त्याच वर्ल्डकपपासून झाली होती. आम्ही या सर्व मजेशीर गोष्टी केल्या. खूप मजा केली आणि तसंच वातावरण मैदानावरही दिसून आलं.”

टी-२० वर्ल्डकप २०२६ स्पर्धेला ७ फेब्रुवारीपासून सुरूवात होणार आहे. या स्पर्धेत भारतीय संघाचा पहिला सामना अमेरिकेविरूद्ध होणार आहे. तर पाकिस्तानविरूद्ध होणारा सामना १५ फेब्रुवारीला होणार आहे. हा सामना श्रीलंकेतील आर. प्रेमदासा स्टेडियममध्ये खेळवला जाईल. याआधी कुठल्याही संघाला मायदेशात खेळताना टी-२० वर्ल्डकपची ट्रॉफी उंचावता आलेली नाही. यासह कुठल्याही संघाने ३ वेळा जेतेपदाचा मान पटकावलेला नाही. आता रोहितचा सल्ला ऐकून भारतीय संघ सलग दुसऱ्यांदा जेतेपदाची ट्रॉफी उंचावणार का? हे पाहणं महत्वाचं ठरणार आहे.