रोहितचे भवितव्य धोक्यात? लॉर्ड्स एकदिवसीय सामना अखेरचा ठरण्याची शक्यता

गेल्या काही काळापासून धावांसाठी झगडत असलेल्या रोहित शर्माचे भारतीय संघातील स्थान धोक्यात आले आहे. इंग्लंडविरुद्ध १९ जुलै रोजी लॉर्ड्सवर होणारा तिसरा एकदिवसीय सामना रोहितचा आंतरराष्ट्रीय कारकीर्दीतील अखेरचा सामना ठरू शकतो.

rohit sharma retirement(लोकसत्ता टिम)

एक्स्प्रेस वृत्त

मुंबई : गेल्या काही काळापासून धावांसाठी झगडत असलेल्या रोहित शर्माचे भारतीय संघातील स्थान धोक्यात आले आहे. इंग्लंडविरुद्ध १९ जुलै रोजी लॉर्ड्सवर होणारा तिसरा एकदिवसीय सामना रोहितचा आंतरराष्ट्रीय कारकीर्दीतील अखेरचा सामना ठरू शकतो. इंग्लंड मालिकेनंतर त्याच्याशिवाय पुढे जाण्याचा ‘बीसीसीआय’च्या निवड समितीने निर्णय घेतल्याचे समजते.

सूत्रांच्या माहितीनुसार, निवड समिती यशस्वी जैस्वालसारख्या प्रतिभावान युवा सलामीवीराला संधी देण्यास उत्सुक आहे. तसेच २०२७ एकदिवसीय विश्वचषकात रोहितच्या भूमिकेबाबतही निवड समिती साशंक आहे. अजित आगरकर यांच्या अध्यतेखालील समितीने गेल्या आठवड्यात प्रशिक्षक गौतम गंभीर याच्यासह रोहितशी चर्चा केल्याची माहिती आहे.

‘‘इंग्लंड दौर्‍यानंतरच्या योजनांत रोहितचा समावेश नाही आणि या मालिकेनंतर ते त्याच्याशिवाय पुढे जाण्याचा विचार करत आहेत, असे निवड समितीने रोहितला कळवले आहे. विशेषत: आपल्या तंदुरुस्तीवर काम केल्यानंतर रोहितला खेळणे सुरू ठेवायचे होते. आता निवड समितीने अंतिम निर्णय घेण्याची जबाबदारी रोहितवरच सोपवली आहे,’’ असे ‘बीसीसीआय’च्या एका सूत्राने सांगितले.

रोहितने यापूर्वीच ट्वेन्टी-२० आंतरराष्ट्रीय क्रिकेटमधून निवृत्ती घेतली आहे. भारताला विश्वचषक जिंकून दिल्यानंतर काही तासांतच, २९ जून २०२४ रोजी त्याने या प्रारूपाला अलविदा केले. मग मे २०२५ मध्ये त्याने कसोटी क्रिकेटमधूनही निवृत्ती जाहीर केली होती. निवड समितीने गेल्या वर्षी रोहितला एकदिवसीय संघाच्या कर्णधारपदावरून हटवून त्याच्या जागी शुभमन गिलची नियुक्ती केली होती. आता निवड समिती त्याच्याबाबत आणखी कठोर निर्णय घेण्याची शक्यता आहे.