BCCI Ajit Agarkar Meeting Rohit Sharma ODI Future Discussion: भारत आणि श्रीलंका यांच्यातील दोन कसोटी सामन्यांच्या कसोटी मालिकेला १५ ऑगस्टपासून सुरूवात झाली आहे. या मालिकेत दोन सामने खेळवले जाणार आहेत. दरम्यान मालिका संपल्यानंतर BCCIचे पदाधिकारी निवड समितीचे अध्यक्ष अजित आगरकर यांच्यासोबत बैठक घेणार आहेत. या बैठकीत आगरकर यांच्या एक वर्षाच्या मुदतवाढीबाबत चर्चा होण्याची शक्यता आहे. याशिवाय रोहित शर्माचं भविष्यदेखील चर्चेचा विषय असणार आहे.
भारताचा माजी अष्टपैलू खेळाडू असलेले आगरकर सप्टेंबरमध्ये निवड समितीच्या अध्यक्ष म्हणून तीन वर्षांचा कार्यकाळ पूर्ण करतील. मात्र, नियमानुसार त्यांना आणखी एक वर्षाची मुदतवाढ मिळू शकते.
दरम्यान, माजी भारतीय कर्णधार रोहित शर्माच्या भवितव्यावरून निवड समिती आणि BCCIमध्ये मतभेद असल्याचं समोर आलं आहे. इंग्लंडविरुद्धची मालिका संपल्यानंतर रोहितला संघातून बाजूला करण्याचा विचार असल्याचं निवड समितीने त्याला कळवलं होतं. मात्र, BCCIचे सचिव देवजीत सैकिया यांनी यापेक्षा वेगळं मत मांडत, “रोहित जोपर्यंत संघाच्या योजनांमध्ये आहे, तोपर्यंत देशाचं प्रतिनिधित्व करत राहील,” असं म्हटलं होतं. त्यामुळे आगरकर यांच्या मुदतवाढीच्या चर्चेबरोबरच रोहितच्या भवितव्यावरही BCCI आणि निवड समितीमध्ये महत्त्वाची चर्चा होण्याची शक्यता आहे.
BCCIला आता २०२७च्या वनडे वर्ल्डकपपूर्वी रोहित शर्माच्या भवितव्याचा मालिकेनुसार आढावा घ्यायचा आहे, अशी माहिती मिळत आहे. त्यामुळे प्रत्येक मालिकेनंतर रोहितच्या कामगिरीचा आणि संघातील त्याच्या भूमिकेचा आढावा घेण्याची जबाबदारी निवड समितीवर असणार आहे.
मात्र, BCCIचे सचिव देवजीत सैकिया यांनी रोहितबाबत केलेल्या वक्तव्यामुळे निवड समिती नाराज असल्याचं समोर आलं आहे. कारण, इंग्लंडमधील वनडे मालिकेनंतर रोहितची संघात निवड केली जाणार नाही, अशी माहिती निवड समितीने त्याला आधीच दिली होती. दुसरीकडे, रोहितला भारतासाठी वनडे क्रिकेट खेळत राहायचं होतं. मात्र, निवड समितीने टीम मॅनेजमेंटशी चर्चा करून यशस्वी जैस्वालसारख्या युवा खेळाडूंना डावाची सुरुवात करण्याची संधी देण्याचा विचार केला होता.
इंग्लंडविरुद्धच्या पहिल्या दोन वनडेत बर्मिंगहॅम आणि कार्डिफमध्ये रोहितने अनुक्रमे ११ आणि २६ धावा केल्या. मात्र, १९ जुलैला लॉर्ड्सवर झालेल्या तिसऱ्या वनडेत त्याने शानदार १३८ धावांची खेळी करत टीकाकारांना उत्तर दिलं. रोहित सध्या केवळ वनडे क्रिकेट खेळत असून, इंग्लंड मालिकेदरम्यान त्याने BCCIच्या काही अधिकाऱ्यांशीही चर्चा केली होती. निवड समितीने आपल्यापुढे पर्याय शोधण्याचा निर्णय घेतल्याने रोहित नाराज असल्याचं समोर आलं होतं.
दरम्यान, रोहित आणि BCCIच्या एका वरिष्ठ अधिकाऱ्यामध्ये झालेल्या बैठकीनंतर तसेच लॉर्ड्सवरील शतकानंतर त्याला वेस्ट इंडिजविरुद्धच्या मायदेशातील मालिकेसाठी भारतीय संघात स्थान मिळू शकतं, अशी माहिती सूत्रांनी दिली आहे.
