वृत्तसंस्था, कोलंबो : श्रीलंकेविरुद्ध १५ ऑगस्टपासून सुरू होणार्या दोन कसोटी सामन्यांच्या मालिकेपूर्वी भारताने एकमेव सराव सामन्यात नाट्यमय विजय मिळवला. या सामन्यात भारतीय संघाने आगामी मालिकेच्या दृष्टीने अनेक प्रश्नांची उत्तरे मिळवली असली, तरी अंतिम अकरामध्ये फिरकीपटूंची निवड हा संघ व्यवस्थापनासमोरील सर्वांत मोठा पेच ठरण्याची शक्यता आहे. याबाबतचा निर्णय पहिल्या कसोटीचे ठिकाण असलेल्या गॉल येथे पोहोचल्यानंतरच घेतला जाईल, असे भारताचे फिरकी गोलंदाजी प्रशिक्षक साईराज बहुतुले यांनी सांगितले. भारताकडे चार गुणवान फिरकीपटू असून त्यांचे वैविध्य महत्त्वाचे ठरेल, असे बहुतुले यांना वाटते.
भारताकडे रवींद्र जडेजा, कुलदीप यादव, मानव सुथार आणि सारांश जैन असे चार फिरकीचे पर्याय आहेत. गॉलच्या खेळपट्टीवर फिरकीला साथ मिळणे अपेक्षित आहे. त्यामुळे पहिल्या कसोटीत भारत तीन किंवा चार फिरकीपटूंसह खेळण्याची शक्यता आहे. ‘‘हा निर्णय आम्ही गॉलला पोहोचल्यानंतरच घेऊ. आमच्या चारही फिरकीपटूंचे वेगवेगळे वैशिष्ट्य आहे. जडेजाच्या रूपात आमच्याकडे अनुभवी फिरकीपटू आहे. मानव सुथारकडे अचूकता आहे. ऑफ-स्पिनर सारांशने देशांतर्गत क्रिकेटमध्ये चांगली कामगिरी केली असून, त्याच कामगिरीच्या जोरावर त्याने राष्ट्रीय संघातील स्थान मिळवले आहे. त्याचा अनुभवही उपयोगी ठरेल,’’ असे बहुतुले म्हणाले.
चायनामन फिरकीपटू कुलदीप यादवचेही संघासाठी विशेष महत्त्व असल्याचे बहुतुले यांनी नमूद केले. ‘‘कुलदीप हा मनगटी फिरकीपटू आहे. संघात अशा प्रकारचा गोलंदाज असणे नेहमीच फायदेशीर ठरते, कारण त्यामुळे गोलंदाजीत वैविध्य येते. चारही गोलंदाज कसोटी सामन्यासाठी सज्ज आहेत. अंतिम निर्णय गॉलमध्येच घेतला जाईल,’’ असे बहुतुले यांनी स्पष्ट केले.
