Srilanka Cricket Team: वर्ल्डकपमधील पराभवानंतर श्रीलंकन क्रिकेटमध्ये भूकंप; दिग्गज खेळाडू संघाची साथ सोडणार?

क्रिकबझने दिलेल्या वृत्तानुसार, श्रीलंकेचा मुख्य प्रशिक्षक सनथ जयसूर्या श्रीलंकेच्या मुख्य प्रशिक्षकाची जबाबदारी सोडणार आहे. त्याने श्रीलंका क्रिकेट बोर्डला याबाबत कुठलीही अधिकृत माहिती दिलेली नाही. आयसीसी टी -२० वर्ल्डकप २०२४ स्पर्धा झाल्यानंतर त्याची श्रीलंकेचा मुख्य प्रशिक्षक म्हणून नियुक्ती करण्यात आली होती. येत्या जून महिन्यात त्याचा मुख्य प्रशिक्षकपदाचा कार्यकाळ संपणार आहे.

आपल्या देशात सामने होत असल्याने श्रीलंकेला जेतेपदासाठी प्रबळ दावेदार मानलं जात होतं. पण श्रीलंकेचा संघ हवी तशी कामगिरी करू शकलेला नाही. आजवर कुठलाही संघ आपल्या मायदेशात खेळताना टी – २० वर्ल्डकप जिंकू शकलेला नाही. त्यामुळे श्रीलंकेकडे इतिहास रचण्याची संधी होती. श्रीलंकेने या स्पर्धेत बलाढ्य ऑस्ट्रेलियाला पराभूत केलं. पण झिम्बाब्वेकडून पराभवाचा सामना करावा लागला. त्यानंतर सुपर ८ मध्ये श्रीलंकेचा संघ एकही सामना जिंकू शकलेला नाही. त्यामुळे हा सामना सेमी फायनलमध्ये प्रवेश करू शकलेला नाही.

पाकिस्तानचा अवघ्या ५ धावांनी विजय

पाकिस्तान आणि श्रीलंका यांच्यात झालेल्या सामन्यात श्रीलंकेने नाणेफेक जिंकून प्रथम गोलंदाजी करण्याचा निर्णय घेतला. प्रथम फलंदाजी करण्यासाठी आलेल्या पाकिस्तानकडून साहिबजादा फरहानने दमदार शतकी खेळी केली. या खेळीच्या बळावर पाकिस्तानने २१२ धावांचा डोंगर उभारला. श्रीलंकेला हा सामना जिंकण्यासाठी २१३ धावा करायच्या होत्या. या धावांचा पाठलाग करताना श्रीलंकेकडून दासून शनाकाने दमदार अर्धशतकी खेळी केली. शेवटच्या षटकात २८ धावांची गरज असताना त्याने २२ धावा कुटल्या. पण श्रीलंकेला हा सामना अवघ्या ५ धावांनी गमवावा लागला.