संजू-क्लासेनमध्ये मैदानावर राडा! सॅमसनचा जळता कटाक्ष अन् क्लासेन अंगावर धावून गेला; सामन्यात नेमकं काय घडलं? VIDEO व्हायरल

Sanju Samson Heinrich Klassen Fight: संजू सॅमसन आणि हेनरिक क्लासेन यांच्यात मैदानावर चांगलीच बाचाबाची झाली. ज्याचा व्हीडिओ सध्या व्हायरल होत आहे.

संजू सॅमसन हेनरिक क्लासेनमध्ये वाद (फोटो-X)

IPL 2026 Sanju Samson Heinrich Klassen Fight Video: चेन्नई सुपर किंग्स व सनरायझर्स हैदराबाद यांच्यातील सामन्यात हेनरिक क्लासेन व संजू सॅमसन यांच्यात मैदानावरच वाद पाहायला मिळाला. संजू व क्लासेन दोघेही तसे शांत स्वभावाचे खेळाडू होते. पण या सामन्यात मात्र दोघेही चांगलेच संतापले होते. १५ व्या षटकात संजूने क्लासेनला कमालीच्या स्टंपिंगवर बाद केलं आणि त्यानंतर तिसऱ्या पंचांनी बाद दिल्यानंतर मैदानावर हा राडा झाला. ज्याचा व्हीडिओ सध्या व्हायरल होत आहे.

चेन्नई सुपर किंग्सने प्रथम फलंदाजी करताना १८० धावा केल्या होत्या. प्रत्युत्तरात हैदराबाद संघाची सुरूवात खराब झाली. हेड ४ धावा करत माघारी परतला. तर अभिषेक शर्मा २६ धावा करत बाद झाला. यानंतर मैदानावर आलेल्या क्लासेनने आपल्या कमालीच्या फॉर्मसह वादळी फटकेबाजी करायला सुरूवात केली. स्पेन्सर जॉन्सनने क्लासेनचा झेल सोडल्याने त्याला जीवदान मिळालं. क्लासेन ४७ धावांवर खेळत असताना नूर अहमदच्या षटकात संजूने त्याला स्टंपिंग करत बाद केलं.

संजू-क्लासेनमध्ये कशावरून झाला वाद?

सॅमसन आणि क्लासेन यांच्यातील वाद १५ व्या षटकात झाला. क्लासेनने तिसऱ्या चेंडूवर नूर अहमदच्या गुगलीवर मोठा फटका मारण्याचा प्रयत्न केला, पण तो चुकला. क्लासेनचा पाय वर उचलला गेला आणि संजू सॅमसनने अवघ्या काही क्षणात त्याला स्टंपिंग करत बाद केलं. आपण नाबाद आहोत असं क्लासेनला वाटलं, पण तिसऱ्या पंचांनी त्याला बाद घोषित केलं.

हेही वाचा

“मला त्याच्यासाठी हा सामना जिंकायचा होता…”, इशान किशन सामनावीर पुरस्कारानंतर रडला, सांगितलं कोणासाठी साकारली मॅचविनिंग खेळी

त्यानंतर संजू सॅमसनला नूर अहमदने मिठी मारलेली असताना संजू क्लासेनकडे जळता कटाक्ष टाकत पाहत होता. तितक्यात त्याच्याजवळून जाणारा क्लासेन त्याला काहीतरी बोलताना दिसला. त्या दोन खेळाडूंमध्ये वाद सुरू झाला. खेळाडूंनी मध्यस्थी केली आणि क्लासेन पॅव्हेलियनकडे परत जाऊ लागला. मात्र, क्लासेन मागे वळून संजूला सातत्याने काहीतरी बोलताना दिसला.

हेही वाचा

हैदराबाद-गुजरात प्लेऑफमध्ये! चेन्नई पराभवासह स्पर्धेबाहेर होण्याच्या उंबरठ्यावर, इशान ठरला सनरायझर्सच्या विजयाचा हिरो

This Guy Klassen has become so unlikable, little success on his head with arrogance !!

Sanju Samson has greater legacy than you both in IPL and Internationals, 2 MOTMs and POTT in WC, dream for you !! #CSKvsSRH pic.twitter.com/LHN53yHP9f
— KNIGHT (@the_knight_era) May 18, 2026

क्लासेन पॅव्हेलियनमध्ये गेल्यानंतर मैदानावरील पंच संजूशी बोलत होते, तेव्हा संजू त्यांच्यावरही संतापलेला दिसला. नेहमी शांत स्वभावाचा संजू क्लासेनबरोबरच्या लढाईदरम्यान चांगलाच संतापला होता. कठीण खेळपट्टीवर क्लासेनने १८०.७७ च्या स्ट्राईक रेटने फलंदाजी केली आणि इशान किशनसोबत एक भक्कम भागीदारी रचली. क्लासेन आणि किशनने ४१ चेंडूंमध्ये तिसऱ्या विकेटसाठी ७५ धावा जोडल्या. या भागीदारीने सामन्याचे चित्र पालटलं. सनरायझर्स हैदराबादने १९ षटकांत १८१ धावांचे लक्ष्य गाठत ५ गडी राखून सामना जिंकला.