पाकिस्तानचा कोच भारताविरुद्धच्या सामन्यादरम्यान फोनवर; आयसीसी कारवाई करणार?

रविवारी बुलावायो इथल्या क्वीन्स स्पोर्ट्स क्लब इथे भारत-पाकिस्तान मुकाबला रंगला. भारताने पाकिस्तानला नमवत सेमी फायनलमध्ये आगेकूच केली. पाकिस्तानला सेमी फायनल प्रवेशासाठी हा सामना ३३.२ षटकात जिंकणं क्रमप्राप्त होतं. मात्र त्यांना या निर्धारित षटकांमध्ये लक्ष्य गाठता आलं नाही. भारतीय संघाने दिलेल्या २५३ धावांच्या आव्हानासमोर खेळताना पाकिस्तानचा डाव १९४ धावांतच आटोपला. २९ चेंडूत ३५ आणि एक विकेट पटकावणाऱ्या कनिष्क चौहानला सामनावीर पुरस्काराने गौरवण्यात आलं. सेमी फायनलमध्ये भारताचा मुकाबला बुधवारी अफगाणिस्तानशी होणार आहे.

सामन्यादरम्यान पाकिस्तानचा मेन्टॉर सर्फराझ अहमद प्लेयर्स एरिया (खेळाडू, पंच, सामनाधिकारी यांच्यासाठी सीमित केलेली जागा) मध्ये मोबाईल वापरत असल्याचं स्पष्ट झालं. आयसीसीच्या नियमांनुसार प्लेयर्स अँड मॅच ऑफिशियल्स एरियामध्ये इलेक्ट्रिक कम्युनिकेशन डिव्हाईस वापरण्यास सक्त मनाई आहे. खेळाडू सामन्याआधी मोबाईल फोन सुरक्षा किंवा लॉजिस्टिक्स मॅनेजरकडे सोपवतात. सामना संपल्यानंतर त्यांना फोन परत मिळतात. फिक्सिंग, स्पॉटफिक्सिंग तसंच भ्रष्टाचाराला आळा घालण्यासाठी आयसीसीने कठोर उपाययोजना अंगीकारल्या आहेत. सामना सुरू असताना खेळाडू, कोचिंग स्टाफ यांच्याशी कोणालाही संपर्क करता येऊ नये तसंच त्यांनीही कोणाशीही इलेक्ट्रॉनिक गॅजेटच्या माध्यमातून बोलू नये तसंत संपर्कही साधू नये.

फोनच्या माध्यमातून खेळाडूंना सूचना देण्यात आल्या नसल्या तरी ड्रेसिंगरुममध्ये फोन आलाच कुठून असा प्रश्न अनेक नेटिझन्सनी विचारला आहे. U19 संघात वयाने बरीच लहान मुलंही खेळत असतात. नियम पाळणं आवश्यक आहे हे संस्कार मनावर बिंबण्याचा कालखंड आहे. त्याच वयात संघाचा मेन्टॉरच नियमांचं जाहीर उल्लंघन करत असेल तर मुलांवर चांगले संस्कार कसे होणार असा सवाल अनेक चाहत्यांनी केला आहे. जडणघडणीच्या काळात असे वरिष्ठ आजूबाजूला असतील तर यांचं भवितव्य काय ते दिसतंच आहे असा टोलाही अनेकांनी लगावला आहे.

दरम्यान सर्फराझ व्यवस्थापकाच्या भूमिकेत असल्याने त्यांना फोन बाळगण्याची परवानगी आहे असं स्पष्टीकरण आयसीसीने दिलं आहे.