रेड बुलच्या सेबॅस्टियन वेटेलने सुरेख कामगिरीचे प्रदर्शन करीत बेल्जियम ग्रां. प्रि. फॉम्र्युला-वन शर्यतीत जेतेपदावर कब्जा केला. या कामगिरीसह विश्वविजेतेपदाच्या शर्यतीत वेटेलने अग्रस्थानाची आघाडी मजबूत केली. २६ वर्षीय वेटेलने पहिल्याच लॅपमध्ये पोल पोझिशनवरून सुरुवात करणाऱ्या लुइस हॅमिल्टनला मागे टाकले. त्यानंतर कारवर अचूक नियंत्रण साधत त्याने या मोसमातील पाचवे, तर कारकिर्दीतील ३१ वे जेतेपद प्राप्त केले. दुसऱ्या क्रमांकावरील फेरारीच्या फर्नाडो अलोन्सोला १६.८६९ सेकंदाने सहजपणे मागे टाकत वेटेलने जेतेपद मिळवले. मर्सिडिझच्या हॅमिल्टनला तिसऱ्या क्रमांकावर समाधान मानावे लागले. हॅमिल्टनचा मर्सिडिझचा सहकारी निको रोसबर्ग चौथा आला. रेड बुलच्या मार्क वेबरने पाचवे, तर मॅकलॅरेनच्या जेन्सन बटनने सहावे स्थान प्राप्त केले. फेरारीचा फेलिपे मासा सातवा, तर लोटसचा रोमेन ग्रॉसजेन आठवा आला. सहारा फोर्स इंडियाचा ड्रायव्हर एड्रियन सुटीलने सुरेख कामगिरी करत नवव्या क्रमांकावर मजल मारली. टोरो रोस्सोच्या डॅनियल रिकाडरेने दहावे स्थान पटकावले.
