LSG vs GT: शुबमन गिलचा मोठा पराक्रम, IPLमध्य खुद्द विराट कोहलीला मागे टाकलं अन् अशी कामगिरी करणारा ठरला…

गुजरात विरूद्ध लखनौ सामन्यात शुबमन गिलने ४० चेंडूंमध्ये ६ चौकार आणि एका षटकारासह ५६ धावांची खेळी केली. या खेळीदरम्यान त्याने ४ हजार धावा पूर्ण केल्या. २६ वर्षे आणि २१६ दिवस वय अलताना हा पराक्रम करून शुबमन गिल आयपीएलच्या इतिहासात ४००० धावा करणारा सर्वात तरुण फलंदाज ठरला आहे. यापूर्वी हा विक्रम विराट कोहलीच्या नावावर होता, ज्याने २७ वर्षे आणि १९५ दिवस वय असताना हा टप्पा गाठला होता.

शुबमन गिलने त्याने आपल्या ४ हजार आयपीएल धावा पूर्ण केल्या असून, डावांच्या आधारावर स्पर्धेत सर्वात जलद ४ हजार धावा करणारा खेळाडू म्हणून विराट कोहलीला मागं टाकलं आहे. आयपीएलमध्ये डावांच्या आधारावर सर्वात जलद ४ हजार धावा पूर्ण करणारा भारतीय फलंदाज हा विक्रम केएल राहुलच्या नावावर आहे. केएलने १०५ डावांमध्ये ही कामगिरी केली. त्याच्यानंतर, शुबमन गिलने ११८ डावांमध्ये ४ हजार धावा पूर्ण करून दुसरं स्थान पटकावलं आहे. यानंतर विराट कोहली तिसऱ्या स्थानावर आहे.

गिलने सर्वात जलद ४ हजार धावा करण्याच्या बाबतीत विराटला मागे टाकलं आहे. विराटने १२८ डावांमध्ये ४ हजार आयपीएल धावा पूर्ण केल्या. तर सुरेश रैना आणि गौतम गंभीर यांनी १४० डावांमध्ये ही कामगिरी केली होती.

आयपीएलमध्ये डावांच्या संख्येनुसार सर्वात जलद ४ हजार धावा करणारा भारतीय खेळाडू

केएल राहुल – १०५ डाव
शुबमन गिल – ११८ डाव
विराट कोहली – १२८ डाव
सुरेश रैना – १४० डाव
गौतम गंभीर – १४० डाव

आयपीएलमधील शुभमन गिलने १२१ सामन्यांच्या ११८ डावांमध्ये ४०३१ धावा केल्या आहेत. यादरम्यान गिलची सरासरी ३९.९१ आणि स्ट्राइक रेट १३९.०४ राहिला आहे. आयपीएलमध्ये त्याच्या नावावर चार शतकं आणि २८ अर्धशतकं आहेत. गिलने २०१८ मध्ये कोलकाता नाईट रायडर्सकडून आपल्या आयपीएल कारकिर्दीला सुरुवात केली. तो या फ्रँचायझीसाठी चार हंगाम खेळला आहे. केकेआरसाठी त्याने ५८ सामन्यांमध्ये ३१.४८ च्या सरासरीने १४१७ धावा केल्या. गिलने आतापर्यंत गुजरातसाठी २५०० पेक्षा जास्त धावा केल्या आहेत.