SRH vs KKR: सनरायझर्सचा केकेआरवर दणदणीत विजय, घरच्या मैदानावर कोलकाता १६ षटकांत ऑलआऊट; कॅप्टन इशानने उघडलं विजयाचं खातं

सनरायझर्स हैदराबादने दिलेल्या २२७ धावांच्या लक्ष्याचा पाठलाग करताना केकेआरची सुरूवात दणक्यात झाली. फिन एलनने पहिल्याच षटकात २५ धावा कुटत संघाला वादळी सुरूवात करून दिली. यानंतर पुढच्याच षटकात हर्ष दुबेने आपल्या गोलंदाजीवर त्याला झेलबाद करत संघाला मोठी विकेट मिळवून दिली. एलन ७ चेंडूत २८ धावा करत बाद जाला. तर कर्णधार रहाणे ८ धावा करत माघारी परतला. तर अंगक्रिश रघुवंशीने पुन्हा एकदा संघाचा डाव सावरला. रघुवंशीने २९ चेंडूत ६ चौकार व २ षटकारांच्या मदतीने ५२ धावा केल्या आणि सलग दुसऱ्या सामन्यात अर्धशतक झळकावलं. तर उपकर्णधार रिंकू सिंहने ३५ धावांची खेळी करत संघाचा डाव सावरला, मात्र त्याला दुसऱ्या टोकावरून अपेक्षित साथ न मिळाल्याने धावांचं अंतर वाढत गेलं आणि परिणामी केकेआरने विकेट्सदेखील गमावल्या.

केकेआरकडून जयदेव उनाडकटने सर्वाधिक ३ विकेट्स घेतल्या. यानंतर इशान मलिंगा आणि नितीश रेड्डी या दोघांनी २-२ विकेट्स घेतल्या. तर हर्ष दुबेने फिन एलनला बाद करत संघाला सर्वात मोठी विकेट मिळवून दिली.

कोलकाता नाईट रायडर्स संघाने नाणेफेक जिंकत सनरायझर्स हैदराबाद संघाला प्रथम फलंदाजीसाठी पाचारण केलं आणि हैदराबादने २२६ धावांचा डोंगर उभारला. ट्रॅव्हिस हेड व अभिषेक शर्माच्या जोडीने संघाला वादळी सुरूवात करून दिली. दोघांनी पॉवरप्लेमध्येच ८२ धावा कुटल्या. हेड ४६ धावा तर अभिषेक शर्मा ४८ धावा करत बाद झाले, त्यामुळे दोघांचही अर्धशतक हुकलं. यानंतर इशान १४ धावांवर, अनिकेत वर्मा १ धाव करत बाद झाले. त्यानंतर हेनरिक क्लासेन व नितीश रेड्डी यांनी ८२ धावांची भागीदारी रचत संघाला २०० धावांच्या पलीकडे नेलं.

हेनरिक क्लासेनने ३५ चेंजूत ४ चौकार व १ षटकाराच्या मदतीने ५२ धावांची खेळी केली. तर नितीश रेड्डीने ३९ धावांचं योगदान दिलं. यानंतर हर्ष दुबेने २ चौकार लगावत संघाला संघाला २२६ धावांचा आकडा गाठून दिला. केकेआरकडून ब्लेसिंग मुझरबानीने सर्वाधिक ४ विकेट्स घेतल्या. तर वैभव अरोराने २ विकेट्स आणि कार्तिक त्यागी व अनुकूल रॉय यांनी प्रत्येकी १-१ विकेट्स घेतल्या.