T20 World Cup 2026: यजमान संघाला धक्का; हा हुकमी खेळाडू वर्ल्डकपबाहेर

श्रीलंकेची सलामीची लढत आयर्लंडविरुद्ध झाली. या लढतीत खेळताना हासारंगाला ही दुखापत झाली. दुखापत झालेली असतानाही हासारंगाने काही षटकं टाकली. हासारंगाच्या मांडीच्या स्नायूंना दुखापत झाली आहे. आयर्लंडविरुद्धच्या लढतीनंतर एमआरआय स्कॅन करण्यात आलं. दुखापतीचं स्वरुप गंभीर असल्याने तो वर्ल्डकपमधले उर्वरित सामने खेळू शकणार नाही हे स्पष्ट झालं. या दुखापतीने हासारंगाला याआधीही सतवलं आहे.

संघाचा प्रमुख फिरकीपटू तसंच फलंदाजीतही योगदान देणारा हासारंगा श्रीलंकेच्या संघाचा अविभाज्य घटक आहे.

टी२० वर्ल्डकप स्पर्धेत सर्वाधिक विकेट्स पटकावणाऱ्यांच्या यादीत हासारंगा ४० विकेट्ससह अव्वल स्थानी आहे. हासारंगाऐवजी दुशन हेमंतला संघात स्थान मिळेल. आयसीसीच्या तांत्रिक समितीच्या मंजुरीनंतर हेमंतचा संघात समावेश करण्यात येईल.

२८वर्षीय हासारंगाने ४ टेस्ट, ६९ वनडे आणि ९५ टी२० सामन्यात श्रीलंकेचं प्रतिनिधित्व केलं आहे.

श्रीलंकेच्या गटात ऑस्ट्रेलिया, झिम्बाब्वे आणि ओमान यांचा समावेश आहे. श्रीलंकेने केवळ एकदा टी२० वर्ल्डकपचं जेतेपद पटकावलं आहे. यजमान असल्यामुळे श्रीलंकेला सुवर्णसंधी होती. हासारंगा दुखापतग्रस्त झाल्याने श्रीलंकेच्या योजनांना धक्का बसला आहे.