क्रिकेट जगतावर शोककळा; सरावानंतर भीषण अपघात, ८ वर्षे कोमात अन् क्रिकेटपटूचा ३४व्या वर्षी मृत्यू

२८ डिसेंबर २०१८ ला दक्षिण कोलंबोतील माउंट लव्हिनिया येथे झालेल्या एका दुःखद अपघातात अक्षू फर्नांडो गंभीर जखमी झाला. समुद्रकिनाऱ्यावर सराव केल्यानंतर, तो एका असुरक्षित रेल्वे ट्रॅक ओलांडत असताना त्याला ट्रेनने धडक दिली. या गंभीर अपघातात त्याला जबर दुखापत झाली, त्यानंतर तो बराच काळ कोमात लाईफ सपोर्ट सिस्टमवर होता.

उजव्या हाताचा प्रतिभावान फलंदाज अक्षु फर्नांडोची देशांतर्गत क्रिकेटमधील कारकिर्द वेगाने प्रगती करत असताना वयाच्या २७ व्या वर्षी हा अपघात झाला. अपघाताच्या काही आठवड्यांपूर्वी, त्याने रागामा क्रिकेट क्लबसाठी त्याचं प्रथम श्रेणी शतक झळकावलं होतं. तो ऑफ-स्पिन गोलंदाजीमध्येही प्रगती करत उत्तम गोलंदाजी करण्याचा प्रयत्न करत होता. वरिष्ठ स्तरावर त्याच्या नावावर ५० पेक्षा जास्त धावांचे एकूण सात डाव होते.

नऊ वर्षांच्या देशांतर्गत क्रिकेट कारकिर्दीत, अक्षु फर्नांडोने कोल्ट्स क्रिकेट क्लब, पनादुरा स्पोर्ट्स क्लब, चिलाव मेरियन्स स्पोर्ट्स क्लबसह अनेक संघांचे प्रतिनिधित्व केलं आणि आपल्या प्रतिभेने निवडकर्त्यांचं लक्ष वेधून घेतलं. आंतरराष्ट्रीय समालोचक आणि रागामा क्रिकेट क्लबचे वरिष्ठ प्रशासक रोशन अबेसिंघे यांनी त्याच्या निधनाबद्दल तीव्र दुःख व्यक्त केलं.

रोशन अबेसिंघे म्हणाले की तो एक उत्कृष्ट तरुण क्रिकेटपटू होता. एका दुःखद अपघातामुळे एका नवोदित कारकिर्दीची सुरुवातच संपुष्टात आली. तो त्याच्या शाळेचा आणि त्याचा क्लब, रागामाचा एक हुशार खेळाडू होता. त्याला ओळखणाऱ्या आपल्या सर्वांसाठी हा खूप दुःखद दिवस आहे. तो नेहमीच आनंदी, मैत्रीपूर्ण आणि उत्तम माणूस होता. अक्षु, तू आमच्या कायम स्मरणार राहशील. अक्षु फर्नांडोचे निधन हे श्रीलंकेच्या क्रिकेटसाठी कधीही भरून न येणारे नुकसान आहे, ज्यांनी एका उदयोन्मुख स्टारला अकाली गमावले आहे.