मुंबई : ठाण्याच्या शुभा भटने डॉ. रमेश यशवंत प्रभू स्मृती महाराष्ट्र राज्य मानांकन टेबल टेनिस स्पर्धेत मुलींच्या २१ वर्षांखालील गटाचे विजेतेपद मिळवले. विलेपार्ले येथील प्रबोधनकार ठाकरे क्रीडा संकुलात सुरू असलेल्या या स्पर्धेत बिगरमानांकित शुभाने चौथ्या मानांकित अनन्या चांदेला हिला ४—३ (४—११, ४—११, ११—७, ८—११, १३—११, ११—८, १३—११) असे रोमहर्षक लढतीत नमवले. पहिले दोन गेम गमावूनही शुभाने दडपणाखाली झोकात पुनरागमन करताना अखेरच्या तीन गेममध्ये सरशी साधली. त्यापूर्वी उपांत्य फेरीत तिने मेघना करंदीकरवर ४—० (१२—१०, ११—४, ११—७, ११—८) असा विजय मिळवून जेतेपदाच्या लढतीतील स्थान पक्के केले होते. मुलींच्या १७ वर्षांखालील गटाच्या अंतिम सामन्यात दुसऱ्या मानांकित तनिशा कोटेचाने जेतेपद मिळवले. तनिशाने श्रावणी सावंतला ४—१ (११—५, ११—९, ५—११, ११—३, ११—६) अशी धूळ चारली. १९ वर्षांखालील गटाच्या अंतिम लढतीत दुसऱ्या मानांकित सायली वाणीने अजिंक्यपद मिळवले. जेनिफर वर्गीसवर ४—० (११—१, ११—८, १५—१३, १२—१०) असे वर्चस्व गाजवले.