Nitish Rana Wicket: एकाच बॉलवर नितीश राणा दोनदा OUT झाला? ‘या’ आगळ्यावेगळ्या विकेटची जगभर चर्चा, नेमकं काय घडलं?

ज्या सामन्यात केएल राहुलने १५० धावांची खेळी केली होती. त्या सामन्यात नितीश राणाकडेही शतक झळकावण्याची संधी होती. पण तो बाद झाला होता. आता चेन्नईविरुद्ध खेळताना दिल्लीचा संघ अडचणीत असताना देखील नितीश राणाकडून मोठ्या खेळीची अपेक्षा होती. पण तो अवघ्या १५ धावा करून बाद झाला. त्याला नूर अहमदने बाद करत माघारी धाडलं. सोशल मीडियावर एक व्हिडिओ तुफान व्हायरल होत आहे, ज्यात नितीश राणा एकाच चेंडूवर दोन वेळा बाद झाल्याचं दिसून येत आहे.

तर झाले असे की, चेन्नईकडून नूर अहमद गोलंदाजीला आला. त्याच्या गोलंदाजीवर नितीश राणाने मोठा फटका मारण्याचा प्रयत्न केला. पण चेंडू हवेत गेला आणि कार्तिक शर्माने सोपा झेल घेतला. ज्यावेळी चेंडू हवेत गेला त्यावेळी त्याचा पाय स्टंपला लागला आणि बेल्स खाली पडली. त्यामुळे तो एकाच चेंडूवर २ वेळा बाद झाला. त्यामुळे एकाच चेंडूवर २ वेळा बाद झाल्यामुळे नितीश राणा तुफान चर्चेत आहे.

या सामन्यात दिल्ली कॅपिटल्सने नाणेफेक जिंकून प्रथम फलंदाजीचा निर्णय घेतला. पण हा निर्णय फसला, कारण दिल्लीच्या फलंदाजांना मोठी खेळी करता आली नाही. पथूम निसांका, केएल राहुल आणि नितीश राणासारखे फलंदाज फ्लॉप ठरले. शेवटी ट्रिस्टन स्टब्सने ३८ आणि समीर रिझवीने ४० धावांची खेळी करून संघाची धावसंख्या १५५ धावांवर पोहोचवली. चेन्नईला हा सामना जिंकण्यासाठी १५६ धावा करायच्या होत्या. या धावांचा पाठलाग करताना चेन्नईकडून संजू सॅमसनने नाबाद ८७ धावा केल्या. तर त्याला चांगली साथ देत कार्तिक शर्माने नाबाद ४१ धावांची खेळी करून चेन्नईला ८ गडी राखून विजय मिळवून दिला.