आयसीसी टी-२० विश्वचषक २०२१ स्पर्धेत आज भारताने अजून एका मोठ्या विजयाची नोंद केली आहे. भारताने दुबईच्या मैदानावर दुबळ्या स्कॉटलंडवर ८ गड्यांनी सहज विजय मिळवत उपांत्या फेरीचे आव्हान शाबुत ठेवले. आज आपला ३३वा वाढदिवस साजरा करणारा भारताचा कप्तान विराट कोहलीने नाणेफेक जिंकून प्रथम गोलंदाजीचा निर्णय घेतला. भारताकडून रवींद्र जडेजा आणि मोहम्मद शमी यांनी प्रत्येकी ३ बळी घेत स्कॉटलंडच्या एकाही फलंदाजाला मैदानावर जास्त काळ टिकू दिले नाही. प्रत्युत्तरात भारतीय सलामीवीर रोहित शर्मा आणि केएल राहुल यांनी दे-दणादण फटकेबाजी केली. राहुलने १८ चेंडूत अर्धशतक ठोकल्यामुळे भारताने हे आव्हान ६.३ षटकातंच ओलांडले. या विजयामुळे भारताने नेट रनरेटमध्ये मोठी कमाई केली. त्यांनी ग्रुप बी मध्ये सर्वात चांगला रनरेट मिळवला. रवींद्र जडेजाला सामनावीर पुरस्काराने गौरवण्यात आले. आता सर्वांचे लक्ष न्यूझीलंड-अफगाणिस्तान सामन्याकडे लागले आहे. अफगाणिस्तानने न्यूझीलंडचा पाडाव केला, तर भारताचा मार्ग सुकर होणार आहे.

भारताचा डाव

रोहित शर्मा आणि केएल राहुल या भारताच्या सलामीवीरांनी पहिल्या षटकापासून हाणामारीला सुरुवात केली. या दोघांनी स्कॉटलंडच्या प्रत्येक गोलंदाजाला १० पेक्षा जास्त धावा कुटल्या. चौथ्या षटकात भारताने अर्धशतक पूर्ण केले. पुढच्या षटकात वेगवान गोलंदाज व्हीलने रोहितला अप्रतिम यॉर्करवर पायचीत पकडले. रोहितने १६ चेंडूत ५ चौकार आणि एक षटकारासह ३० धावा केल्या. पॉवरप्लेच्या शेवटच्या षटकात राहुलने अर्धशतक पूर्ण केले. १८ चेंडूत राहुलने ५० धावा ठोकल्या. या षटकाच्या शेवटच्या चेंडूवर राहुल झेलबाद झाला. त्याने ६ चौकार आणि ३ षटकार ठोकले. सातव्या षटकाच्या तिसऱ्या चेंडूवर सूर्यकुमार यादवने ग्रीव्ह्सला षटकार ठोकत भारताच्या नावे ८ गड्यांनी मोठा विजय नोंदवला. या विजयासह भारताने नेट रनरेटमध्ये मोठी झेप घेतली आहे. भारताचे ४ गुण झाले असून ते आता तिसऱ्या क्रमांवर आहेत.

हेही वाचा – INS vs AFG : मॅच फिक्सिंगच्या शंकेला टॉस दरम्यानची ‘ती’ घटना ठरतेय कारणीभूत; VIDEO झाला व्हायरल!

स्कॉटलंडचा डाव

स्कॉटलंडचे सलामीवीर काइल कोएत्झर आणि जॉर्ज मुन्सी यांनी डावाची सुरुवात केली. भारताचा जलदगती गोलंदाज जसप्रीत बुमराहने तिसऱ्या षटकात स्कॉटलंडचा कप्तान काइल कोएत्झरचा (१) त्रिफळा उडवला. पॉवरप्लेच्या शेवटचे षटकात जलदगती गोलंदाज मोहम्मद शमीने धोकादायक मुन्सीला झेलबाद करत स्कॉटलंडला दुसरा धक्का दिला. मुन्सीने ४ चौकार आणि एका षटकारासह २४ धावा केल्या. सहा षटकात स्कॉटलंडने २ बाद २७ धावा केल्या. मुन्सीनंतर स्कॉटलंडचे फलंदाज बिथरले. फिरकीपटू रवींद्र जडेजाने सातव्या षटकात दोन धक्के दिले. जडेजाने बेरिंग्टनला आणि क्रॉसलाही तंबूत धाडले. शमीने टाकलेल्या १७व्या षटकात स्कॉटलंडने तीन फलंदाज गमावले. त्याने पहिल्या चेंडूवर मॅकलिओडची (१६) दांडी गुल केली. पुढच्या चेंडूवर शरीफ धावबाद झाला. तिसऱ्या चेंडूवर शमीने अप्रतिम यॉर्कर टाकत अलास्डेअर इव्हान्सला बोल्ड केले. १८व्या षटकात स्कॉटलंडने आपला दहावा फलंदाजही गमावला. बुमराहने मार्क वॉटचा त्रिफळा उडवला. भारताने स्कॉटलंडला १० षटकांपेक्षा जास्त चेंडू निर्धाव खेळवले. स्कॉटलंडने १७.४ षटकात ८५ धावा केल्या. भारताकडून रवींद्र जडेजा आणि मोहम्मद शमी यांनी प्रत्येकी ३ बळी घेतले. तर बुमराहला २ बळी घेता आले.

Live Updates
21:53 (IST) 5 Nov 2021
भारताचा सहज विजय

सातव्या षटकाच्या तिसऱ्या चेंडूवर सूर्यकुमार यादवने ग्रीव्ह्सला षटकार ठोकत भारताच्या नावे ८ गड्यांनी मोठा विजय नोंदवला. या विजयासह भारताने नेट रनरेटमध्ये मोठी झेप घेतली आहे. भारताचे ४ गुण झाले असून ते आता तिसऱ्या क्रमांवर आहेत.

21:44 (IST) 5 Nov 2021
राहुलचे वेगवान अर्धशतक

पॉवरप्लेच्या शेवटच्या षटकात राहुलने अर्धशतक पूर्ण केले. १८ चेंडूत राहुलने ५० धावा ठोकल्या. या षटकाच्या शेवटच्या चेंडूवर राहुल झेलबाद झाला. त्याने ६ चौकार आणि ३ षटकार ठोकले.

21:41 (IST) 5 Nov 2021
रोहित माघारी

पाच षटकात भारताने १ बाद ७० धावा केल्या. व्हीलने टाकलेल्या या षटकात राहुलने एक चौकार आणि एक षटकार ठोकला. तर रोहितने एक चौकार ठोकला. शेवटच्या चेंडूवर व्हीलने रोहितला यॉर्कर टाकत पायचीत पकडले. रोहितने १६ चेंडूत ५ चौकार आणि एक षटकारासह ३० धावा केल्या.

21:35 (IST) 5 Nov 2021
चार षटकात भारत

चार षटकात भारताने बिनबाद ५३ धावा केल्या. या षटकात रोहितने एक षटकार आणि दोन चौकार ठोकले.

21:28 (IST) 5 Nov 2021
तीन षटकात भारत

तीन षटकात भारताने बिनबाद ३९ धावा केल्या. या षटकात राहुलने एक चौकार आणि एक षटकार ठोकला. रोहितनेही पुढे येत एक चौकार वसूल केला.

21:23 (IST) 5 Nov 2021
दोन षटकात भारत

दोन षटकात भारताने बिनबाद २३ धावा केल्या. या षटकात राहुलने वेगवान गोलंदाज ब्रॅडली व्हीलला तीन चौकार ठोकले.

21:17 (IST) 5 Nov 2021
पहिल्या षटकात भारत

पहिल्या षटकात भारताने बिनबाद ८ धावा केल्या.

21:13 (IST) 5 Nov 2021
भारताच्या फलंदाजीला सुरुवात

रोहित शर्मा आणि केएल राहुल यांनी भारताच्या डावाची सुरुवात केली आहे.

20:58 (IST) 5 Nov 2021
अवघ्या ८५ धावांत स्कॉटलंडचा खुर्दा

१८व्या षटकात स्कॉटलंडने आपला दहावा फलंदाजही गमावला. बुमराहने मार्क वॉटचा त्रिफळा उडवला. भारताने स्कॉटलंडला १० षटकांपेक्षा जास्त चेंडू निर्धाव खेळवले. स्कॉटलंडने १७.४ षटकात ८५ धावा केल्या. भारताकडून रवींद्र जडेजा आणि मोहम्मद शमी यांनी प्रत्येकी ३ बळी घेतले. तर बुमराहला २ बळी घेता आले.

20:51 (IST) 5 Nov 2021
स्कॉटलंडला एका षटकात तीन धक्के

शमीने टाकलेल्या १७व्या षटकात स्कॉटलंडने तीन फलंदाज गमावले. त्याने पहिल्या चेंडूवर मॅकलिओडची (१६) दांडी गुल केली. पुढच्या चेंडूवर शरीफ धावबाद झाला. तिसऱ्या चेंडूवर शमीने अप्रतिम यॉर्कर टाकत अलास्डेअर इव्हान्सला बोल्ड केले. १७ षटकात स्कॉटलंडने ९ बाद ८३ धावा केल्या.

20:43 (IST) 5 Nov 2021
१६ षटकात स्कॉटलंड

१६ षटकात स्कॉटलंडने ६ बाद ८१ धावा केल्या.

20:38 (IST) 5 Nov 2021
स्कॉटलंडचा सहावा गडी तंबूत

१४व्या षटकात अश्विनला आपले पहिले यश मिळाले. त्याने ग्रीव्ह्सला तंबूत पाठवले. १४ षटकात स्कॉटलंडने ६ बाद ६४ धावा केल्या.

20:31 (IST) 5 Nov 2021
१३ षटकात स्कॉटलंड

१३ षटकात स्कॉटलंडने ५ बाद ६१ धावा केल्या. १२व्या षटकात जडेजाने पुन्हा गोलंदाजीला येत आपला तिसरा बळी घेतला. त्याने लीस्कला (२१) पायचीत पकडले.

20:23 (IST) 5 Nov 2021
११ षटकात स्कॉटलंड

११व्या षटकात स्कॉटलंडने अर्धशतकी सीमा ओलांडली. ११ षटकात त्यांनी ४ बाद ५७ धावा केल्या.

20:16 (IST) 5 Nov 2021
१० षटकात स्कॉटलंड

१० षटकात स्कॉटलंडने ४ बाद ४४ धावा केल्या.

20:11 (IST) 5 Nov 2021
नऊ षटकात स्कॉटलंड

नऊ षटकात स्कॉटलंडने ४ बाद ३६ धावा केल्या.

20:07 (IST) 5 Nov 2021
आठ षटकात स्कॉटलंड

जडेजाच्या दोन बळींनंतर मॅकलिओड आणि मायकेल लीस्क मैदानात आहेत. आठ षटकात स्कॉटलंडने ४ बाद ३२ धावा केल्या.

20:05 (IST) 5 Nov 2021
स्कॉटलंडला एका षटकात दोन धक्के!

फिरकीपटू रवींद्र जडेजाने स्कॉटलंडच्या बेरिंग्टनला शून्यावर बाद केले. जडेजाने याच षटकात क्रॉसलाही (२) पायचीत पकडले. सात षटकात स्कॉटलंडने ४ बाद २९ धावा केल्या.

20:04 (IST) 5 Nov 2021
स्कॉटलंडला एका षटकात दोन धक्के!

फिरकीपटू रवींद्र जडेजाने स्कॉटलंडच्या बेरिंग्टनला शून्यावर बाद केले. जडेजाने याच षटकात क्रॉसलाही (२) पायचीत पकडले. सात षटकात स्कॉटलंडने ४ बाद २९ धावा केल्या.

19:58 (IST) 5 Nov 2021
पॉवरप्लेमध्ये स्कॉटलंड

पॉवरप्लेचे शेवटचे षटक जलदगती गोलंदाज मोहम्मद शमीने टाकले. त्याने धोकादायक मुन्सीला झेलबाद करत स्कॉटलंडला दुसरा धक्का दिला. मुन्सीने ४ चौकार आणि एका षटकारासह २४ धावा केल्या. मुन्सीनंतर रिची बेरिंग्टन मैदानात आला आहे. शमीने हे षटक निर्धाव टाकले. सहा षटकात स्कॉटलंडने २ बाद २७ धावा केल्या.

19:52 (IST) 5 Nov 2021
पाच षटकात स्कॉटलंड

पाच षटकात स्कॉटलंडने १ बाद २७ धावा केल्या.

19:48 (IST) 5 Nov 2021
चार षटकात स्कॉटलंड

चार षटकात स्कॉटलंडने १ बाद २५ धावा केल्या. या षटकात मुन्सीने तीन चौकार ठोकत अश्विनचे स्वागत केले.

19:44 (IST) 5 Nov 2021
स्कॉटलंडला पहिला धक्का

बुमराहने तिसऱ्या षटकात स्कॉटलंडचा कप्तान काइल कोएत्झरचा (१) त्रिफळा उडवला. कोएत्झरनंतर मॅथ्यू क्रॉस मैदानात आला आहे. तीन षटकात स्कॉटलंडने १ बाद १३ धावा केल्या. बुमराहने हे षटक निर्धाव टाकले.

19:38 (IST) 5 Nov 2021
दोन षटकात स्कॉटलंड

दोन षटकात स्कॉटलंडने बिनबाद १३ धावा केल्या.

19:35 (IST) 5 Nov 2021
पहिल्या षटकात स्कॉटलंड

पहिल्या षटकात मुन्सीने बुमराहला शानदार षटकार ठोकला. पहिल्या षटकात स्कॉटलंडने बिनबाद ८ धावा केल्या.

19:30 (IST) 5 Nov 2021
सामन्याला सुरुवात

स्कॉटलंडचे सलामीवीर काइल कोएत्झर आणि जॉर्ज मुन्सी मैदानात. वेगवान गोलंदाज जसप्रीत बुमराह भारतासाठी पहिले षटक टाकत आहे.

19:10 (IST) 5 Nov 2021
भारतीय संघात एक बदल

भारताने आज जलदगती गोलंदाज शार्दुल ठाकूरला विश्रांती दिली असून फिरकीपटू वरुण चक्रवर्तीला संधी दिली आहे.

19:05 (IST) 5 Nov 2021
दोन्ही संघांची प्लेईंग इलेव्हन

भारत – विराट कोहली (कर्णधार), केएल राहुल, रोहित शर्मा, सूर्यकुमार यादव, ऋषभ पंत (यष्टीरक्षक), हार्दिक पंड्या, रवींद्र जडेजा, रवीचंद्रन अश्विन, वरुण चक्रवर्ती, मोहम्मद शमी, जसप्रीत बुमराह.

स्कॉटलंड – काइल कोएत्झर (कर्णधार), जॉर्ज मुन्सी, मॅथ्यू क्रॉस (यष्टीरक्षक), रिची बेरिंग्टन, कॅलम मॅकलिओड, मायकेल लीस्क, ख्रिस ग्रीव्ह्स, मार्क वॉट, सफयान शरीफ, अलास्डेअर इव्हान्स, ब्रॅडली व्हील.

19:04 (IST) 5 Nov 2021
बर्थडेला विराटनं जिंकला टॉस

आज आपला ३३वा वाढदिवस साजरा करणारा भारताचा कप्तान विराट कोहलीने नाणेफेक जिंकून प्रथम गोलंदाजीचा निर्णय घेतला आहे.

18:29 (IST) 5 Nov 2021
थोड्याच वेळात टॉस

थोड्याच वेळात म्हणजे सात वाजता टॉस होईल.

18:27 (IST) 5 Nov 2021
पहिल्यांदाच भारत-स्कॉटलंड भिडणार

भारत आणि स्कॉटलंड प्रथमच टी-२० आंतरराष्ट्रीय स्पर्धेत भिडणार आहेत. २००७ मध्ये खेळल्या गेलेल्या पहिल्या टी-२० विश्वचषकाच्या गट टप्प्यात दोन्ही संघ आमनेसामने येणार होते, पण पावसामुळे सामना रद्द झाला.

18:26 (IST) 5 Nov 2021
दोन्ही संघांची संभाव्य प्लेईंग इलेव्हन

भारत - विराट कोहली (कर्णधार), केएल राहुल, रोहित शर्मा, सूर्यकुमार यादव, ऋषभ पंत (यष्टीरक्षक), हार्दिक पंड्या, रवींद्र जडेजा, रवचंद्रन अश्विन, शार्दुल ठाकूर, मोहम्मद शमी, जसप्रीत बुमराह.

स्कॉटलंड - काइल कोएत्झर (कर्णधार), जॉर्ज मुन्सी, मॅथ्यू क्रॉस (यष्टीरक्षक), रिची बेरिंग्टन, कॅलम मॅकलिओड, मायकेल लीस्क, ख्रिस ग्रीव्ह्स, मार्क वॉट, सफयान शरीफ, अलास्डेअर इव्हान्स, ब्रॅडली व्हील.