U-19 World Cup: टीम इंडियाने आतापर्यंत किती वेळा अंडर-१९ वर्ल्डकप जिंकला आहे? वाचा फायनलमध्ये कसा आहे रेकॉर्ड

U-19 World Cup: भारतीय संघाने आतापर्यंत किती वेळा अंडर-१९ वर्ल्डकप स्पर्धा जिंकली आहे? जाणून घ्या.

team india (फोटो- एक्स)

Team India Record In ICC Under 19 World Cup Finals: आयसीसी अंडर-१९ वर्ल्डकप २०२६ स्पर्धेतील फायनलमध्ये प्रवेश करणारे दोन्ही संघ ठरले आहेत. इंग्लंडने बलाढ्य ऑस्ट्रेलियाला पराभूत करून फायनलमध्ये प्रवेश केला आहे. तर भारत आणि अफगाणिस्तान या दोन्ही संघांमध्येही रोमांचक सामना पाहायला मिळाला. या सामन्यात भारतीय संघाने बाजी मारून दहाव्यांदा या स्पर्धेतील फायनलमध्ये प्रवेश केला आहे. हे या स्पर्धेचे १६ वे हंगाम असणार आहे. आतापर्यंत सर्वाधिक वेळेस जेतेपदाचा मान पटकावणाऱ्या संघांच्या यादीत भारतीय संघ अव्वल स्थानी आहे. दरम्यान भारतीय संघाने किती वेळा या स्पर्धेचं जेतेपद पटकावलं आहे? जाणून घ्या.

अंडर-१९ वर्ल्डकप २०२६ स्पर्धेत आतापर्यंत भारतीय संघाने ५ वेळा जेतेपदाचा मान पटकावला आहे. भारतीय संघाने १९९९-२००० झालेल्या स्पर्धेत पहिल्यांदाच जेतेपदाची ट्रॉफी उंचावली होती. त्यानंतर २००७-०८ मध्ये झालेल्या हंगामात दुसऱ्यांदा, २०१२ मध्ये झालेल्या स्पर्धेत तिसऱ्यांदा, २०१७-१८ मध्ये झालेल्या स्पर्धेत चौथ्यांदा आणि २०२१ मध्ये खेळताना भारतीय संघाने पाचव्यांदा जेतेपदाचा मान पटकावला होता. यावेळी आयुष म्हात्रेच्या नेतृत्वाखाली खेळणारा भारतीय संघ विजयाचा षटकार मारण्याच्या प्रयत्नात असणार आहे.

हेही वाचा

बांगलादेशच्या संघाला भारतात सुरक्षेची काळजी, अंपायर मात्र ऑन ड्युटी

आरोन जॉर्ज आणि वैभव सूर्यवंशीसारखे स्फोटक फलंदाज संघात असणाऱ्या भारतीय संघाने आतापर्यंत साखळी फेरी, सुपर सिक्स फेरीत आणि सेमीफायनलमध्येही दमदार कामगिरी केली आहे. भारतीय संघाने या स्पर्धेत एकही सामना गमावलेला नाही.या स्पर्धेतील दुसऱ्या सेमीफायनलचा सामना भारत आणि अफगाणिस्तान या दोन्ही संघांमध्ये पार पडला. या सामन्यात भारतीय संघाने अफगाणिस्तानवर एकतर्फी विजय मिळवला. हा विजय अतिशय खास ठरला. कारण याआधी कुठल्याही संघाने इतक्या मोठ्या आव्हानाचा यशस्वी पाठलाग केला नव्हता.

भारतीय संघाने ९ वेळेस फायनलमध्ये प्रवेश केला आहे. यापैकी ५ सामने जिंकले आहेत. तर ४ सामन्यांमध्ये पराभवाचा सामना करावा लागला आहे. तर इंग्लंडला केवळ एकदाच या ट्रॉफीवर नाव कोरता आलं आहे. १९९७-९८ मध्ये झालेल्या स्पर्धेत इंग्लंडने जेतेपदाचा मान पटकावला होता. त्यानंतर इंग्लंडला एकदाही ही ट्रॉफी जिंकता आलेली नाही. २०२२ मध्ये झालेल्या अंडर-१९ वर्ल्डकप स्पर्धेत इंग्लंडने फायनलमध्ये प्रवेश केला होता.या स्पर्धेतही इंग्लंडला भारतीय संघाकडून पराभवाचा सामना करावा लागला होता. हा सामना इंग्लंडने ४ गडी राखून गमावला होता. यावेळी इंग्लंड पराभवाचा बदला घेणार, की भारतीय संघ पुन्हा इंग्लंडवर भारी पडणार, हे पाहणं महत्वाचं ठरणार आहे.

हेही वाचा

“तू फक्त ट्रॉफी जिंकून आण, मी…”, सुनील गावस्करांचं सूर्यकुमारला खास वचन, टीम इंडियाने T20WC जिंकल्यास…

सर्वाधिक वेळेस अंडर-१९ वर्ल्डकप जिंकणाऱ्या संघांच्या यादीत ऑस्ट्रेलियाचा संघ दुसऱ्या स्थानी आहे. ऑस्ट्रेलियाने आतापर्यंत ४ वेळा जेतेपदाची ट्रॉफी उंचावली आहे. यावेळीही ऑस्ट्रेलियाने सेमीफायनलमध्ये प्रवेश केला होता. पण इंग्लंडकडून ऑस्ट्रेलियाचा पराभवाचा सामना करावा लागला. तर सर्वाधिक वेळेस वर्ल्डकप जिंकणाऱ्या संघांच्या यादीत पाकिस्तानचा संघ तिसऱ्या स्थानी आहे. पाकिस्तानने २ वेळा ही स्पर्धा जिंकली आहे. तर दक्षिण आफ्रिका, बांगलादेश आणि वेस्ट इंडिजने प्रत्येकी १-१ वेळेस ही स्पर्धा जिंकली आहे.