Team India Record: टीम इंडियाची विक्रमी कामगिरी! टी-२० वर्ल्डकपमध्ये भारतीय संघाने पहिल्यांदाच केला ‘हा’ पराक्रम

या सामन्यात नामिबियाच्या कर्णधाराने नाणेफेक जिंकून भारतीय संघाला प्रथम फलंदाजी करण्याचं आमंत्रण दिलं. भारतीय संघाला देखील नाणेफेक जिंकून प्रथम फलंदाजी करायची होती, असं सूर्यकुमार यादव म्हणाला. त्यामुळे भारतीय फलंदाजांकडे मोठी धावसंख्या उभारण्याची संधी होती. या सामन्यात अभिषेक शर्माला विश्रांती देण्यात आली आहे. त्याच्या जागी संजू सॅमसन इशान किशनसोबत डावाची सुरूवात करण्यासाठी मैदानात आला. टी-२० वर्ल्डकप स्पर्धेत आपला पहिलाच सामना खेळत असलेल्या संजू सॅमसनने षटकार मारून आपल्या टी-२० वर्ल्डकप कारकिर्दीची सुरूवात केली. त्यानंतर त्याने आणखी काही मोठे फटके मारले. पण तो २२ धावा करून माघारी परतला.

संजू सॅमसन बाद झाल्यानंतर इशान किशनने नामिबियाच्या गोलंदाजांची चांगलीच धुलाई केली. पॉवरप्लेच्या षटकांमध्ये फलंदाजी करताना इशान किशन आणि तिलक वर्मा यांनी दमदार पॉवर हिंटीग केली. दोघांनी मिळून पॉवरप्लेमध्ये भारतीय संघाची धावसंख्या ६ षटकात १ गडी बाद ८६ धावांवर पोहोचवली. ही भारतीय संघाची टी-२० वर्ल्डकप स्पर्धेच्या इतिहासातील पॉवरप्लेमध्ये उभारलेली सर्वोच्च धावसंख्या आहे. तर एकूण स्पर्धेतील चौथी सर्वोच्च धावसंख्या आहे.

टी-२० वर्ल्डकप स्पर्धेच्या इतिहासात पॉवरप्लेमध्ये फलंदाजी करताना सर्वोच्च धावसंख्या उभारण्याचा रेकॉर्ड हा वेस्ट इंडिजच्या नावावर आहे. वेस्ट इंडिजने २०२४ मध्ये झालेल्या टी-२० वर्ल्डकप स्पर्धेत अफगाणिस्तानविरूद्ध खेळताना १ गडी बाद ९२ धावा केल्या होत्या. तर २०१४ मध्ये झालेल्या टी-२० वर्ल्डकप स्पर्धेत नेदरलँडने आयर्लंडविरूद्ध खेळताना १ गडी बाद ९१ धावा केल्या होत्या. २०१६ मध्ये झालेल्या टी-२० वर्ल्डकप स्पर्धेत दक्षिण आफ्रिकेविरूद्ध झालेल्या सामन्यात खेळताना इंग्लंडने ३ गडी बाद ८९ धावा केल्या होत्या. आता भारतीय संघाने नामिबियाविरूद्ध खेळताना १ गडी बाद ८६ धावा केल्या आहेत.