The Hundred: १०० चेंडू अन् २४१ धावा! सनरायझर्सने घडवला इतिहास; ‘द हंड्रेड लीग’मध्ये पहिल्यांदाच असं घडलं

या सामन्यात सनरायझर्स लीड्सचा संघ प्रथम फलंदाजी करण्यासाठी मैदानात उतरला होता. या संघाकडून मिचेल मार्श आणि रायन रिक्लटन या दोघांनी मिळून लंडन स्पिरीट संघातील गोलंदाजांचा चांगलाच समाचार घेतला. दोघांनी मिळून पहिल्या विकेटसाठी अवघ्या ५४ चेंडूंमध्ये विक्रमी १४८ धावा चोपल्या. ही द हंड्रेड लीग स्पर्धेच्या इतिहासातील आतापर्यंतची पहिल्या विकेटसाठी केलेली सर्वात मोठी भागीदारी ठरली. यादरम्यान मार्शने तुफान फटकेबाजी करुन अवघ्या ३७ चेंडूंमध्ये ७६ धावांची वादळी खेळी केली. त्याने २४ चेंडूंमध्ये आपलं अर्धशतक पूर्ण केलं. आतापर्यंत त्याने या स्पर्धेत एकूण २३ षटकार खेचले आहेत. यासह या स्पर्धेत सर्वाधिक धावा करणाऱ्या फलंदाजांच्या यादीत तो अव्वल स्थानी आहे.

या सामन्यात सनरायझर्स लीड्सच्या दोन्ही फलंदाजांकडून तुफान फटकेबाजी पाहायला मिळाली. एका बाजूने मिचेल मार्श, तर दुसऱ्या बाजूने रायन रिक्लटनकडूनही दमदार फलंदाजी पाहायला मिळाली. रिकल्टनने अवघ्या २१ चेंडूंमध्ये आपलं अर्धशतक पूर्ण केलं. त्याने शेवटपर्यंत किल्ला लढवत ४२ चेंडूंमध्ये नाबाद ९४ धावांची खेळी केली. यादरम्यान त्याला शतक झळकावण्याची संधी होती. पण त्याचं शतक अवघ्या ६ धावांनी हुकलं. या दोघांनी वेगवान सुरुवात करुन दिल्यानंतर हॅरी ब्रूकने वादळी अर्धशतकी खेळी करुन दमदार शेवट केला. शेवटी फलंदाजी करताना ब्रूकने अवघ्या १५ चेंडूंमध्ये अर्धशतक पूर्ण केलं. हे या स्पर्धेच्या इतिहासातील संयुक्तरित्या सर्वात वेगवान अर्धशतक आहे. यादरम्यान त्याने १८ चेंडूंमध्ये ५५ धावांचे योगदान दिले. या खेळीच्या बळावर सनरायझर्स लीड्स संघाने २४१ धावांचा डोंगर उभारला. ही या स्पर्धेच्या इतिहासातील आतापर्यंतची सर्वात मोठी धावसंख्या आहे.

लंडन स्पिरीट संघाला हा सामना जिंकण्यासाठी १०० चेंडूंमध्ये २४२ धावा करायच्या होत्या. या धावांचा पाठलाग करताना लंडन स्पिरीट संघाला ६ गडी बाद २०४ धावांपर्यंत मजल मारता आली. यासह सनरायझर्स लीड्स संघाने हा सामना ३७ धावांनी आपल्या नावावर केला. पण हा सामना आतापर्यंतचा सर्वात रोमांचक सामना ठरला. कारण दोन्ही डावात मिळून एकूण ४४६ धावा जोडल्या गेल्या. यादरम्यान ३१ षटकार मारण्यात आले.