टिम डेव्हिडचं रौद्र रूप! फायनलमध्ये अवघ्या ३० चेंडूंत १२ षटकारांसह ९८ धावांची खेळी, संघाला केलं चॅम्पियन; पाहा VIDEO

अबूधाबी टी-10 लीगच्या अंतिम सामन्यात यूएई बुल्सकडून खेळणाऱ्या टिम डेव्हिडने फक्त ३० चेंडूत नाबाद ९८ धावा केल्या. डेव्हिडच्या स्फोटक फलंदाजीमुळे त्याच्या संघाने १० षटकांत १५० धावा केल्या आणि अंतिम फेरीत शानदार विजय मिळवत युएई बुल्स संघाने स्पर्धेचं जेतेपद आपल्या नावे केलं.

यूएई बुल्सची सुरुवात निराशाजनक झाली. फिल सॉल्टने सुरुवात चांगली केली पण तो अवघ्या आठ चेंडूंत १८ धावा करून बाद झाला. त्यानंतर टिम डेव्हिडने क्रीजवर येऊन कहर केला. टिम डेव्हिडने पहिल्या १३ चेंडूंत शांतपणे डाव सावरला, पण नंतर जोहर इक्बालच्या षटकात त्याने सलग चार षटकार लगावले. नवव्या षटकात डेव्हिडने आणखी तीन षटकार खेचले.

शेवटच्या षटकात टिम डेव्हिडचं अजूनच रौद्र रूप पाहायला मिळालं. त्याने अ‍ॅशमीड नेडच्या षटकात पाच षटकार खेचत ३२ धावा केल्या. त्याने गोलंदाजाच्या पहिल्या चेंडूवर एक षटकार, दुसऱ्या चेंडूवर दोन धावा आणि त्यानंतरच्या चार चेंडूंवर सलग चार षटकार मारले. या ३० धावांच्या खेळीतील १८ चेंडूत त्याने १२ गगनचुंबी षटकार खेचले.

टिम डेव्हिडची खेळी अ‍ॅस्पेन स्टॅलियन्स संघासाठी इतकी विनाशकारी ठरली की त्यांना १५० धावांचा आकडाच गाठता आला नाही. स्टॅलियन्सने १० षटकांत फक्त ७० धावा केल्या. सुनील नरेनने २ षटकांत फक्त १० धावा दिल्या. फजलहक फारूकीने एका षटकात फक्त २ धावा दिल्या. स्टॅलियन्सचा कोणताच फलंदाज २० धावांचा आकडाही गाठू शकला नाही.

आयपीएल २०२६ च्या आधी आरसीबीसाठी हा फॉर्म एक आनंदाची गोष्ट आहे. गेल्या आयपीएल हंगामात, डेव्हिडने १२ डावांमध्ये ६२.३३ च्या सरासरीने १८७ धावा केल्या होत्या आणि आता त्याची आक्रमक फलंदाजी पुन्हा एकदा संघासाठी फायदेशीर ठरू शकते.