CSK vs SRH: याला म्हणतात आदर! धोनीसाठी केलेल्या ‘त्या’ कृतीने उर्विल पटेलने जिंकली सर्वांची मनं; VIDEO पाहिलात का?

चेन्नई सुपर किंग्स आणि सनरायझर्स हैदराबाद सामन्याच्या पहिल्या डावानंतर ही घटना घडली. चेन्नई सुपर किंग्स २०२६ हंगामातील आपला शेवटचा घरचा सामना खेळत होते, त्यामुळे सनरायझर्सचा डाव संपल्यानंतर सीएसकेचे सर्व खेळाडू टीम फोटोसाठी मैदानावर गेले. धोनीला पाहताच चाहत्यांनी एकच जल्लोष केला.

२०२६ आयपीएलच्या टीम फोटो सेशनसाठी धोनी मैदानावर आला होता. संपूर्ण संघाने टीम फोटो क्लिक केला. धोनीसह काही खेळाडू खुर्चीत बसले होते. त्यानंतर धोनी उठल्यानंतर त्याने स्वत:ची खुर्ची उचलली आणि तो जात होता. हे पाहताच मागून येणाऱ्या उर्विल पटेलने धोनीकडून लगेच खुर्ची काढून घेतली आणि ती ठेवण्यासाठी तो पुढे गेला. धोनीने तिथून जाताना उर्विलच्या पाठीवर थाप मारत जणू त्याला थँक्यू म्हणत पुढे निघून गेला.

धोनीप्रति उर्विल पटेलने दाखवलेला हा आदर पाहून चाहत्यांनी त्याच्या कृतीचं कौतुक केलं आहे. ४४ वर्षीय महेंद्रसिंग धोनी सीएसकेच्या शेवटच्या घरच्या सामन्यासाठी चेन्नईला पोहोचला होता. दुखापतीमुळे तो यंदाच्या स्पर्धेतील एकही सामना खेळू शकला नाही, पण त्याला आपल्या चाहत्यांचे आभार मानण्यासाठी चेन्नईला जायचं होतं. म्हणूनच दुखापत असूनही तो चेन्नईला गेला. पोटरीच्या दुखापतीमुळे तो आतापर्यंत आयपीएल २०२६ मध्ये एकही सामना खेळलेला नाही.

चेपॉकच्या मैदानावर खेळल्या गेलेल्या या सामन्यात चेन्नईने नाणेफेक जिंकत प्रथम फलंदाजीचा निर्णय घेतला आणि १८१ धावांचं आव्हान हैदराबाद संघासमोर ठेवलं. हैदराबादविरूद्ध चेन्नईने चांगली गोलंदाजी केली, पण हेनरिक क्लासेन व इशान किशन यांच्यामुळे हैदराबाद संघ सामना जिंकला. सनरायझर्ससाठी, इशान किशनने (४७ चेंडूंत ७० धावा) आणि हेनरिक क्लासेन (२६ चेंडूंत ४७ धावा) यांनी शानदार खेळी करत संघाला १९ षटकांत १८१ धावांचे लक्ष्य गाठून ५ गडी राखून विजय मिळवून दिला.