Vaibhav Suryavanshi Duleep Trophy Record Break: १५ वर्षीय वैभव सूर्यवंशीने दुलीप ट्रॉफी स्पर्धेच्या सेमीफायनल सामन्यात वादळी खेळी साकारली आहे. सेमीफायनलमध्ये संघाचं नेतृत्त्व करत असलेल्या वैभव सूर्यवंशीने फलंदाजीत धुमाकूळ घातलेला पाहायला मिळाला. वैभव सूर्यवंशीन पुन्हा एकदा नर्व्हस नाईन्टीजमध्ये बाद होत त्याचं शतक हुकलं असलं तरी त्याने मोठा विक्रम आपल्या नावे केला आहे.
सेंट्रल झोनविरुद्धच्या उपांत्य सामन्यात ईस्ट झोनकडून खेळताना वैभव सूर्यवंशीने ५७ वर्षांपूर्वीचा एक विक्रम मोडीत काढला आहे. सूर्यवंशीने लक्ष्मण सिंग यांना मागे टाकलं आहे; दुलीप ट्रॉफीच्या उपांत्य सामन्यात आपल्या डावातील ४२ व्या चेंडूवर वैभवने लक्ष्मण सिंग यांचा १९६९ मधील विक्रम मोडला. वैभव सूर्यवंशीने दुलीप ट्रॉफीमधील सेमीफायनल सामन्यात ८१ चेंडूत ७ चौकार व ८ षटकारांसह ९२ धावांची खेळी केली आहे.
दुलीप ट्रॉफीत खेळत असलेल्या वैभवला हंगामातील पहिल्या सामन्यात चांगली कामगिरी करता आली नाही, तरीही दुसऱ्या सामन्यात त्याने शानदार फलंदाजी करत अर्धशतक झळकावलं. या स्पर्धेत अर्धशतक झळकावणारा तो आता सर्वात तरुण फलंदाज ठरला आहे.
वैभव सूर्यवंशीने दुलीप ट्रॉफीत इतिहास घडवला!
उपांत्य सामन्यात प्रथम फलंदाजी करताना सेंट्रल झोनने २६६ धावा केल्या. त्यानंतर सोमवारी, वैभव सूर्यवंशी आणि अभिमन्यू ईश्वरन यांनी ईस्ट झोनसाठी डावाची सुरुवात केली. या सामन्यात वैभव सूर्यवंशीने आपल्या नेहमीच्या शैलीतच फलंदाजी केली. आक्रमक पवित्रा घेत वैभवने अवघ्या ४२ चेंडूंत अर्धशतक पूर्ण केलं; या खेळीदरम्यान त्याने एक षटकारही लगावला. मात्र, या खेळीदरम्यान त्याने प्रतिस्पर्धी संघाला बाद करण्याच्या दोन संधी दिल्या, परंतु क्षेत्ररक्षण करणाऱ्या संघाने झेल सोडून त्या संधी वाया घालवल्या.
वैभव सूर्यवंशीने ५० धावांचा टप्पा गाठताच, तो दुलीप ट्रॉफीमध्ये अर्धशतक झळकावणारा सर्वात तरुण फलंदाज ठरला. आज ३१ ऑगस्ट रोजी वैभवचं वय १५ वर्षे आणि १५७ दिवस इतकं आहे. यापूर्वी, १९६९ मध्ये लक्ष्मण सिंग यांनी वयाच्या १६ वर्षे आणि २३ दिवस वय असताना दुलीप ट्रॉफीमध्ये अर्धशतक केलं होतं. या यादीत पियुष चावला तिसऱ्या स्थानावर आहे; त्याने २००५ मध्ये वयाच्या १६ वर्षे आणि ३०७ व्या दिवशी अर्धशतक झळकावण्याची कामगिरी केली होती.
अर्धशतक पूर्ण केल्यानंतरही वैभव थांबला नाही आणि त्याने आक्रमक फलंदाजी सुरूच ठेवली. मात्र, सूर्यवंशी पुन्हा नर्व्हस नाईन्टीजमध्ये बाद झाला आणि त्याचं शतक हुकलं. त्याने ७९ चेंडूंत ९२ धावांची खेळी केली, ज्यामध्ये सात चौकार आणि सात षटकारांचा समावेश होता. त्याने ११६.४६ च्या स्ट्राईक रेटने फलंदाजी केली, परंतु आणखी एक षटकार मारण्याच्या प्रयत्नात तो शतकापासून अवघ्या आठ धावा दूर असताना बाद झाला.
