वैभव सूर्यवंशीचा वर्ल्ड रेकॉर्ड, U-19 इतिहासात अशी कामगिरी करणारा जगातील पहिला खेळाडू

बांगलादेशविरुद्ध खेळल्या गेलेल्या सामन्यात १४ वर्षीय धडाकेबाज फलंदाज वैभव सूर्यवंशीने आणखी एक ऐतिहासिक कामगिरी केली. बुलावायो येथे खेळल्या जात असलेल्या बांगलादेशविरूद्ध सामन्यात वैभवने फक्त ६७ चेंडूत ६ चौकार व ३ षटकारांच्या मदतीने ७२ धावांची शानदार खेळी केली आणि या खेळीदरम्यान त्याने विश्वविक्रमाला गवसणी घातली.

आक्रमक फलंदाजीसाठी ओळखल्या जाणाऱ्या वैभव सूर्यवंशीने या सामन्यात उत्कृष्ट फलंदाजी करत संघासाठी महत्त्वपूर्ण धावा केल्या. आक्रम फलंदाजी करणाऱ्या वैभवने फलंदाजीसाठी अवघड असलेल्या खेळपट्टीवर त्याने सावध फलंदाजी करत संधी मिळताच आक्रमक फलंदाजी केली. वैभवने फक्त ३० चेंडूत त्याचं अर्धशतक पूर्ण केलं. यासह वैभव सूर्यवंशीने पुरुषांच्या १९ वर्षांखालील विश्वचषकाच्या इतिहासात सर्वात कमी वयात अर्धशतक झळकावण्याचा नवा विश्वविक्रम रचला. त्याने १४ वर्षे आणि २९६ दिवस वय असताना ही कामगिरी केली.

यापूर्वी हा विक्रम अफगाणिस्तानच्या शाहिदुल्लाह कमालच्या नावावर होता, ज्याने २०१४ मध्ये १५ वर्षे १९ दिवस वय असताना वेस्ट इंडिजविरुद्ध अर्धशतक झळकावलं होतं. वैभवच्या या कामगिरीमुळे पाकिस्तानचा स्टार फलंदाज बाबर आझम आता या यादीत तिसऱ्या स्थानावर घसरला आहे. त्याने २०१० मध्ये १५ वर्षे आणि ९२ दिवस वय असताना वेस्ट इंडिजविरुद्ध हा पराक्रम केला होता.

आयसीसी पुरुष अंडर-१९ विश्वचषकात ५०+ धावा करणारे सर्वात तरुण खेळाडू

१४ वर्षे २९६ दिवस – वैभव सूर्यवंशी भारत वि. बांगलादेश, बुलावायो, २०२६

१५ वर्षे १९ दिवस – शाहिदुल्लाह कमाल अफगाणिस्तान वि. वेस्ट इंडिज, दुबई, २०१४

१५ वर्षे ९२ दिवस – बाबर आझम, पाकिस्तान वि. वेस्ट इंडिज, पामरस्टन नॉर्थ, २०१०

१५ वर्षे १२५ दिवस – परवेझ मलिकझाई, कॉक्स बाजार, २०१६

१५ वर्षे १३२ दिवस – शरद वेसावकर, नेपाळ वि. इंग्लंड, चट्टोग्राम, २००४

वैभवने अर्धशतक पूर्ण केलं, तेव्हा संघाची धावसंख्या फक्त ६८ होती. त्यापैकी ५० धावा वैभवने एकट्याने केल्या. यादरम्यान, वैभवने अभिज्ञान कुंडूसह ६२ धावांची महत्त्वपूर्ण भागीदारी करून संघाला १०० धावांचा टप्पा ओलांडून दिला. वैभवला त्याचं शतक गाठता आलं नाही आणि तो ७२ धावांवर बाद झाला. २७ व्या षटकात वेगवान गोलंदाज इक्बाल हुसेन इमोनने त्याला बाद केलं. वैभवने फक्त ६७ चेंडूत ७२ धावा केल्या, ज्यामध्ये सहा चौकार आणि तीन षटकारांचा समावेश होता.