विराटने ऑटोग्राफसाठी दुर्लक्ष करताच छोट्या चाहत्याने फेकली बॅट अन् रागात…; टीम हॉटेलमध्ये काय घडलं? पाहा VIDEO

दिल्ली कॅपिटल्सविरूद्ध सामन्यात विराट कोहलीने छोटी पण प्रभावी खेळी केली. या छोट्या खेळीच्या बळावर विराट कोहली आयपीएल इतिहासात ९ हजार धावा पूर्ण करणारा पहिला फलंदाज ठरला आहे. तो या मोसमात आतापर्यंत उत्कृष्ट फॉर्ममध्ये आहे. सामन्यानंतर जेव्हा विराट कोहली हॉटेलमध्ये पोहोचला, तेव्हा त्याच्या एका चाहत्याने त्याचा ऑटोग्राफ घेण्याचा प्रयत्न करत असतानाचा व्हिडिओ सोशल मीडियावर वेगाने व्हायरल होत आहे.

सोशल मीडियावर व्हायरल होत असलेल्या एका व्हिडिओमध्ये, एक लहान मुलगा टीम हॉटेलबाहेर एक छोटी बॅट घेऊन उभा होता आणि ऑटोग्राफच्या आशेने विराट कोहलीला वारंवार हाक मारत होता. त्यानंतर कोहली बाकीच्या टीमसोबत कडक सुरक्षेत हॉटेलमध्ये प्रवेश करताना दिसला. त्या मुलाने हाका मारूनही, विराट ऑटोग्राफ देण्यासाठी थांबला नाही आणि पुढे निघून गेला. कोहलीने इअरफोन घातले होते, त्यामुळेच कदाचित त्याचं या लहान चाहत्याकडे लक्ष गेलं नसावं.

निराश झालेल्या त्या मुलाने विराट कोहलीला जाताना पाहताच दिलेल्या प्रतिक्रियेने सर्वांचं लक्ष वेधलं. विराटला जाताना पाहताच त्या मुलाने रागाने आपली बॅट फेकून दिली आणि तो रडू लागला. व्हिडिओमध्ये त्या मुलाची निराशा आणि अश्रू स्पष्टपणे दिसत आहेत. सुरक्षेतील कोणतीही त्रुटी टाळण्यासाठी सर्व आयपीएल संघ टीम हॉटेलमध्ये आपल्या खेळाडूंसाठी आणि सपोर्ट स्टाफसाठी कडक नियमांचे पालन करतात. तसेच, क्रिकेटपटूंना टीम हॉटेलमध्ये चाहत्यांकडून येणाऱ्या सेल्फी किंवा ऑटोग्राफच्या विनंत्या नाकारण्याचा सामान्यतः सल्ला दिला जातो.

दिल्ली कॅपिटल्सविरुद्धचा हा सामना केवळ आरसीबीच्या विजयामुळेच नव्हे, तर विराट कोहलीच्या मोठ्या कामगिरीमुळेही खास होता. या सामन्यादरम्यान विराट कोहलीने नाबाद २३ धावा केल्या आणि आयपीएलच्या इतिहासात ९ हजार धावा पूर्ण करणारा तो पहिला फलंदाज ठरला. दरम्यान, दिल्ली कॅपिटल्सचा संघ अवघ्या ७५ धावांवर सर्वबाद झाला आणि आरसीबीने केवळ ६.३ षटकांतच लक्ष्य गाठलं.