T20 World Cup 2026: युद्धामुळे वेस्ट इंडिज संघाचं मायदेशी प्रयाण लांबणीवर

आयसीसी आणि संबंधित सरकारी यंत्रणांच्या संपर्कात असून, खेळाडूंना सुरक्षितपणे मायदेशी परतता यावं यासाठी काळजी घेत आहोत असं वेस्ट इंडिज क्रिकेट बोर्डाने म्हटलं आहे. दुबई विमानतळाला या युद्धाचा फटका बसला आहे. जागतिक हवाई वाहतुकीचा मध्यबिंदू असं दुबईचं वर्णन केलं जातं पण युद्धामुळे मध्य पूर्वेतली वाहतूक पूर्णत:विस्कळीत झाली आहे.

खेळाडूंच्या सुरक्षेला सर्वोच्च प्राधान्य आहे. युद्धजन्य परिस्थितीमुळे हवाई वाहतुकीवर परिणाम झाला आहे. परिस्थिती नियंत्रणात येईपर्यंत प्रवास करणं योग्य नसल्याने वेस्ट इंडिजचा संघ भारतातच आहे असं वेस्ट इंडिज क्रिकेट बोर्डाने म्हटलं आहे. चाहत्यांचं प्रेम आणि पाठिंबा याकरता आम्ही ऋणी आहोत. परिस्थिती आटोक्यात आल्यानंतर संबंधित यंत्रणांशी समन्वयानंतर प्रवासाचं वेळापत्रक ठरवलं जाईल असं बोर्डाने म्हटलं आहे.

याच परिस्थितीमुळे झिम्बाब्वेचा संघही भारतात अडकला आहे. झिम्बाब्वेच्या संघाने ऑस्ट्रेलिया आणि श्रीलंकेला नमवत सुपर८ फेरी गाठली होती. मात्र सुपर८ मध्ये त्यांना एकही सामना जिंकता आला नाही. त्यामुळे त्यांचं आव्हान संपुष्टात आलं. झिम्बाब्वेचा संघही सोमवारी मायदेशी परतणार होता. मात्र हवाई वाहतूक कोलमडल्याने हा संघही भारतातच आहे.